24 mln teńgesinen aıyryldy: Aqmola oblysynda ınternet alaıaqtyqqa qatysty is tergelip jatyr
ASTANA. KAZINFORM — Aqmola oblysynyń kásipkeri iri ınternet-alaıaqtyqtyń qurbany boldy. Bul týraly oblystyq polıtsııa departamentiniń baspasóz qyzmeti jarııalady.
Jábirlenýshiniń aıtýynsha, ózderin bank qyzmetkeri retinde tanystyrǵandar ony birden úsh bankte birneshe nesıe resimdeýge kóndirgen. Osydan keıin ol barlyq qarajatty alaıaqtar kórsetken shottarǵa aýdarǵan.
Alaıaqtar onymen telefon arqyly ǵana emes, beıne qońyraý arqyly da turaqty baılanysta bolǵan. Sonymen qatar, olar er adamǵa kúdik týǵyzbaý úshin bank qyzmetkerlerine qandaı túsinikteme berý kerektigin aldyn ala nusqaǵan. Atap aıtqanda, ótinish berýshige qurylys materıaldaryn satyp alý úshin úlken soma qajet ekenin habarlaý usynyldy.
Birneshe kún boıy jábirlenýshi alaıaqtardyń nusqaýy boıynsha áreket etip, bankterdiń fılıaldaryna, sondaı-aq elordanyń saýda úılerine baryp, sol jerden dropperlerdiń shottaryna mobıldi aýdarymdar jasaǵan. Nebári tórt kún ishinde keltirilgen zalal 24 mıllıon teńgeden asty.
Osy fakti boıynsha sotqa deıingi tergeý amaldary júrgizilip jatyr.
— Polıtseıler azamattardy kezekti ret belgisiz tulǵalardyń qońyraýlaryna senbeýge, olar kim bolyp kórinse de, úshinshi tulǵalardyń nusqaýy boıynsha nesıeler resimdeýden jáne aqshalaı qarajatty kúmándi shottarǵa aýdarýdan bas tartýǵa shaqyrady, — delingen aqparatta.
Aıta keteıik, Qazaqstanda 600 adamdy aldaǵan kúdiktiler 916 mln teńgeni ıemdengen.
