249 adam aýrý juqtyrdy: Armenııa tótenshe jaǵdaı rejımin kúsheıtti

EREVAN. QazAqparat – Armenııa koronavırýs juqtyrǵandar sanynyń artýyna, onyń el aýmaǵyndaǵy geografııasynyń keńeıýine baılanysty tótenshe jaǵdaı rejımin qatańdatty. Bul týraly Armenııa premer-mınıstri Nıkol Pashınıan azamattarǵa úndeýinde aıtty, dep habarlaıdy QazAqparattyń menshikti tilshisi.

Premer-mınıstr Nıkol Pashınıannyń málimetinshe, 24 naýryzdaǵy jaǵdaı boıynsha Armenııada 249 adam koronavırýs ınfektsııasyn juqtyrǵan. Aýrý juqtyrý geografııasy keńeıip, Erevandy jáne respýblıkadaǵy 7 oblysty qamtyǵan. Osyǵan oraı premer-mınıstr TJ rejımin qatańdatatynyn málim etti.

Onyń aıtýynsha, ınfektsııanyń ári qaraı taralýynyń aldyn alý maqsatynda qyzmeti ómirlik mańyzǵa ıe emes kásiporyndar óz jumysyn toqtatady. Buǵan qosa, azamattardyń erkin júrip-turýyna, kóshede eki adamnan kóp jınalýǵa shekteý qoıylady. Barlyq meıramhanalar men dámhanalardyń jumysy toqtatylyp, kólik júrgizýshilerine tek bir adamdy alyp júrýge ruqsat etiledi.

Nıkol Pashınıannyń atap ótýinshe, azyq-túlik dúkenderi, dárihanalar men bankter óz jumysyn jalǵastyrady. Saǵat 10:00-den bastap 12:00-ge deıin atalǵan mekemeler 65 jastan asqan azamattarǵa ǵana qyzmet kórsetedi.

Sonymen qatar, Armenııa densaýlyq saqtaý mınıstri Arsen Torosıannyń 24 naýryzdaǵy málimeti boıynsha 14 naýqas tolyq emdelip shyqqan. Juqpaly aýrýlar aýrýhanasynda jatqan eki naýqastyń testi teris nátıje kórsetken.

Eske salaıyq, Armenııada alǵash koronavırýs juqtyrǵan adam 1 naýryzda tirkeldi.

foto: pastinfo.am