24/7 baqylaý júıesi aıyppul sanyn kóbeıtýge arnalǵan ba — «Qazaqtelekom» jaýaby

ASTANA. KAZINFORM — «Qazaqtelekom» aktsıonerlik qoǵamynyń bas ákimshilik dırektory Erjan Meıramov «Ulttyq beınebaqylaý» júıesi qalaı jumys isteıtinin aıtty. 

— Kesheden beri qazaqstandyqtardy 24/7 formatynda baqylaıtyn kameralar ornatylatyny týraly habar tarap jatyr. Bul qandaı kameralar bolady? Qaı jerge qoıylady jáne aıyppul salýǵa arnalǵan ba, — dep surady jýrnalıst Úkimet otyrysynan keıin ótken baspasóz máslıhatynda.

«Qazaqtelekom» ókili atalǵan júıe birden birneshe fýnktsııany atqaratynyn atap ótti.

— Meniń túsingenimshe, siz ulttyq beınemonıtorıng júıesi týraly aıtyp otyrǵan sııaqtysyz. Bul júıe — búkil beıneaǵyndy bir jerge quıyp, óńdeıtin júıe. «Qazaqtelekom» osy júıeniń operatory bolyp belgilengen. Oǵan óńirlerdegi kameralar da qosylady. Qazir qalalardyń qaýipsizdigi úshin ornatylyp, jumys istep turǵan kameralar da osy júıege biriktiriledi. Maqsaty — quqyq qorǵaý men tártipti jaqsartý. «Sergek» sııaqty kameralardyń bári osy júıege biriktiriledi. Beınemálimettiń bárin «Qazaqtelekom» basqaryp, memlekettik organdarǵa saraptalǵan aqparattar berip otyrady, — deıdi Erjan Meıramov.

Sondaı-aq, atalǵan júıe tek aıyppul taǵaıyndaý úshin qurylyp jatyr degen boljamdardy teriske shyǵardy.

— Bul jerde búkil júıe mindetti túrde aıyppuldarǵa jumys istemeıdi. Beıneaqparattardyń qoldanys aıasy áldeqaıda keń. «Sergek» sııaqty júıeler aıyppuldarǵa baǵyttalǵany túsinikti. Al ákimdikter qoqysty beıbereket tastaý sııaqty áreketterdi anyqtaýǵa osy beınematerıaldardy qoldanýy múmkin. Osy sııaqty kóptegen maqsat bar. Al qaı bul júıe qaı oryndardy qamtıtynyn jergilikti ákimdikter anyqtaıdy, — dedi «Qazaqtelekom» AQ bas ákimshilik dırektory.

Eske salsaq, Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev elimizde «Ulttyq beınebaqylaý júıesi» engiziletinin málim etken edi.