246 nysannyń qurylysy barysynda múmkindigi shekteýli azamattar úshin qoljetimdilik saqtalmaǵan
ASTANA. QazAqparat - Elimizdegi 246 nysannyń qurylysy barysynda múmkindigi shekteýli azamattar úshin qoljetimdilik saqtalmaǵan. Búgin Parlament Májilisi Áleýmettik-mádenı damý komıtetiniń keńeıtilgen otyrysynda Ulttyq ekonomıka mınıstrligi Qurylys, turǵyn úı-kommýnaldyq sharýashylyǵy jáne jer resýrstaryn basqarý komıtetiniń tóraǵasy Qosman Aıtmuhambetov osylaı málim etti.
Komıtet otyrysynda múmkindigi shekteýli adamdardyń qoǵamǵa beıimdelýi máselesi talqylanǵan bolatyn.
Komıtet basshysynyń aıtýynsha, múmkindigi shekteýli adamdar úshin kedergisiz orta qalyptastyrý - bul qurylys salýdyń qoldanystaǵy normatıvtik-tehnıkalyq bazasynda tolyq engizilgen. Degenmen, júrgizilgen saraptaýlar barysynda birqatar olqylyqtardyń oryn alyp otyrǵany anyqtaldy.
«2013 jyldan bastap, memlekettik saraptamadan ótetin nysandar múmkindigi shekteýli azamattar úshin talaptardy saqtamasa, olar qaıta jóndeýge usynylyp, qaıtarylady. Saraptamadan ótkizilmeıdi. 2013 jyl men 2014 jyldyń 8 aıy boıynsha jalpy múmkindigi shekteýli adamdar úshin qoljetimdilik normalary saqtalmaǵan 246 nysan anyqtaldy. Aıta keterligi, búgingi tańda kásipkerlikti tekserýge moratorııge qatysty, bizdiń qyzmetkerler ondaı qurylystardy teksere almaıdy. Degenmen, qabyldanatyn nysandarda qoljetimdilik qatań qaralady», - deıdi Q. Aıtmuhambetov.
Budan bólek, komıtet tóraǵasy múmkindigi shekteýli azamattardyń qoljetimdiligine qatysty nysandarda arnaıy oryndarǵa talaptardyń sapasyz bolatynyn da atap ótti. «Máselen, pandýs salsa, onyń eńisi durys eseptelmeıdi. Mundaı nysandar bizde kóp», - deıdi komıtet tóraǵasy.
