245 mektep keshendi renovatsııadan ótip jatyr

ASTANA. KAZINFORM — Memleket basshysynyń tapsyrmasymen elimizde biryńǵaı zamanaýı mektep ınfraqurylymyna kóshýge baǵyttalǵan aýqymdy jańǵyrtý jumystary bastaldy. Aldaǵy úsh jylda elimizdiń barlyq óńirinde 1231 mektepti jańǵyrtý josparlanyp otyr. Bul týraly Oqý-aǵartý mınıstrliginiń baspasóz qyzmetri habarlady. 

Bıylǵy jyly 245 mektepte keshendi jumys bastaldy. Onyń 146-sy aýyldyq jerlerde, 99-y qalalarda. Jospar boıynsha:

214 mektepke — kúrdeli jóndeý júrgiziledi;

19 mektepte — aǵymdaǵy jóndeý;

12 mektepke — rekonstrýktsııalaý júrgiziledi.

Jobany iske asyrý shamamen 100 myń oqýshy úshin bilim alý jaǵdaıyn jaqsartýǵa múmkindik beredi.

— Joba zamanaýı bilim berý standarttaryna saı toǵyz negizgi baǵyt boıynsha júzege asyrylady. Jańǵyrtý jumystary aıasynda mektep ǵımarattaryna kúrdeli jóndeý júrgizý, pándik kabınettermen jabdyqtaý, mektep jıhazdaryn jańartý, talshyqty-optıkalyq baılanys jelilerine qosý, sport zaldaryn, kitaphanalar men ashanalardy jańǵyrtý, qaýipsizdik júıelerimen jabdyqtaý jáne aýmaqtardy zamanaýı standarttar boıynsha abattandyrý kózdelgen, — delingen mınıstrlik habarlamasynda.

Aýyldyq jerlerdegi bilim berý uıymdaryna erekshe kóńil bólinýde. Bul qala men aýyl mektepteri arasyndaǵy bilim sapasyndaǵy alshaqtyqty azaıtyp, balalardyń turǵylyqty jerine qaramastan teń jaǵdaıda bilim alý jáne jan-jaqty damý múmkindikterin qamtamasyz etedi. 

Aıta ketelik mektepterdegi jańa oqý jylynyń kestesi bekitilgen edi.