242 myńnan asa qazaqstandyq ataýly áleýmettik kómek aldy
ASTANA. KAZINFORM — 2025 jylǵy 1 maýsymdaǵy jaǵdaı boıynsha 242 myńnan astam adamǵa ataýly áleýmettik kómek kórsetildi, dep habarlaıdy Eńbekmıni baspasóz qyzmeti.
— 2025 jylǵy 1 maýsymǵa 45,2 myń otbasyndaǵy 242,4 myń adamǵa 13,4 mlrd somasyna ataýly áleýmettik kómek taǵaıyndaldy. 2025 jyly osy maqsatqa bıýdjetten 132,9 mlrd teńge qarastyryldy, — delingen vedomstvo habarlamasynda.
Buryn habarlanǵandaı, AÁK-niń negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK mynalardy kózdeıdi:
— tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;
— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. 2025 jylǵy 1 maýsymǵa AÁK alýshylar qatarynan mektep jasyna deıingi 74,5 myń balaǵa 1,8 mlrd teńge somasyna qosymsha tólem taǵaıyndaldy;
— jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.
Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq Elektrondyq úkimet portaly (egov.kz) arqyly bere alady.
Esterińizge sala keteıik, 2025 jylǵy 1 qańtardan bastap Qazaqstandaǵy kedeılik shegi óńirlik medıandyq tabystyń 35% deńgeıinde, biraq óńirlik eń tómen kúnkóris deńgeıiniń 70%-nan tómen emes deńgeıde aıqyndalǵan.
Buǵan deıin 2025 jylǵy 16 maýsymnan bastap Qazaqstanda ataýly áleýmettik kómek (AÁK) taǵaıyndaý men tóleýdiń jańartylǵan qaǵıdalary kúshine enetini habarlandy.