241,6 mln teńge bereshek: prokýratýra gaz jetkizýdi toqtatýǵa jol bermedi
ASTANA. KAZINFORM — Túrkistan oblysynyń Arys aýdanynda prokýratýra ınvestordyń quqyǵyn qorǵap, tabıǵı gaz berýdiń toqtatylýyna jol bermedi. Prokýrorlyq yqpal etý sharalarynyń nátıjesinde bereshek ótele bastalyp, qala turǵyndaryn gazben úzdiksiz qamtamasyz etý saqtaldy. Bul týraly Bas prokýratýra málim etti.
Túrkistan oblysynyń Arys aýdanynyń prokýratýrasy Investorlardyń quqyqtaryn qorǵaý jónindegi komıtetpen birlesip, ınvestordyń quqyqtaryn qorǵap, Arys qalasy turǵyndaryn tabıǵı gazben úzdiksiz qamtamasyz etýdi qamtamasyz etti.
Tekserý barysynda «OtebayGaz Aimaq» JShS-niń «QazaqGaz» UK» AQ aldyndaǵy bereshegine baılanysty qala tutynýshylaryna tabıǵı gaz berýdi ýaqytsha toqtatý qaýpi týyndaǵany anyqtaldy.
— 241,6 mln teńge kólemindegi bereshek Arys qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń gazben jabdyqtaý qyzmetterin kórsetý týraly shart boıynsha mindettemelerin bıýdjet qarajatynyń tapshylyǵyna baılanysty ýaqtyly oryndamaýynan qalyptasqan, — delingen habarlamada.
Qalyptasqan jaǵdaı ınvestordyń quqyqtarynyń buzylýyna qaýip tóndirip qana qoımaı, qala turǵyndaryn tabıǵı gazben turaqty qamtamasyz etýge de keri áser etýi múmkin edi.
Investordyń quqyqtaryn qorǵaý jáne áleýmettik shıelenistiń týyndaýyna jol bermeý maqsatynda aýdan prokýratýrasy Arys qalasy ákimdigine zań buzýshylyqtardy joıý jáne qalyptasqan bereshekti óteý boıynsha sharalar qabyldaý týraly prokýrorlyq qadaǵalaý aktisin engizdi.
Prokýrorlyq qadaǵalaý aktisin qaraý nátıjesinde qala ákimdigi kepildik hat usynyp, bereshekti óteý kestesin bekitti. Oǵan sáıkes ınvestorǵa aı saıyn 50 mln teńgeden tóleý kózdelgen.
— Búginde prokýrorlyq yqpal etý sharalarynyń nátıjesinde «OtebayGaz Aimaq» JShS-ne 40 mln teńge tólenip, kásiporyn qyzmetiniń turaqtylyǵyna tóngen táýekelder tómendetilip, turǵyndardy tabıǵı gazben turaqty qamtamasyz etýge múmkindik berildi, — delingen habarlamada.
Investorlardyń quqyqtaryn qorǵaý, kásipkerlik qyzmetti júrgizýge kedergi keltiretin ákimshilik jáne ózge de tosqaýyldardy joıý jumystary prokýratýra organdarynyń turaqty baqylaýynda.
Bıznes pen ınvestorlardyń quqyqtaryn qorǵaý máseleleri boıynsha Arys aýdandyq prokýratýrasyna 8 (705) 889-75-53 telefony arqyly nemese 115 Call-ortalyǵyna habarlasýǵa bolady.
Buǵan deıin Mańǵystaýda kásipkerlerdiń quqyǵyn buzǵandarǵa 9,1 mln teńge aıyppul salynǵanyn jazdyq.
