24 jastaǵy qazaqstandyq arý Miss Intercontinental Halyqaralyq baıqaýyna qatysady
ALMATY. QazAqparat - Qazaqstandyq 24 jastaǵy boıjetken Fılıppınde ótetin Miss Intercontinental-2019 baıqaýynda baq synamaq, dep habarlaıdy QazAqparat tilshisi.
Ázıza Toqashova Astana qalasynyń turǵyny, ekonomıst mamandyǵyn támamdaǵan.
Qazir boıjetken óziniń baǵyn model bıznesinde, blogerlik salada synap júr.
«Men shaǵyn qalada dúnıege keldim. Bala kezimnen ataqty bolǵym keldi. Balet mektebinde tálim aldym. Meniń otbasym barlyq qadamyma qoldaý bildirip otyr», - dedi Ázıza Toqashova óziniń anketasynda.
Odan bólek boıjetken tennıs, ıogamen aınalysady. Attyń qulaǵynda oınaıdy.
«Men áleýmettik jumyspen aınalysqandy jaqsy kóremin. Balalar úıin aralaǵandy jaqsy kóremin. Meniń ómirimdegi eń uly múmkindikterdiń biri - osy keremet baıqaýǵa qatysý. Men burynnan armanǵa senetinmin. Qazirgi armanym - Qurlyq arýy ataný», - dedi qazaqstandyq boıjetken.
Aıta ketý kerek, bıyl atalǵan baıqaý Fılıppındegi Manıla qalasynda ótedi.
Jeńimpazǵa beriletin Oriental Holy Water táji 361 446 AQSh dollaryna baǵalanyp otyr.
Bul baıqaý qańtardyń basynda bastaldy. Qazir irikteý kezeńi júrip jatyr. Fınal 26-qańtarda ótedi.
