24 túzetý — Senat tutynýshylar quqyǵyn qorǵaý zańyn Májiliske qaıtardy
ASTANA. KAZINFORM — Senat depýtattary «QR keıbir zańnamalyq aktilerine qarjy naryǵyn damytý, qarjylyq kórsetiletin qyzmetterdi tutynýshylardyń quqyqtaryn qorǵaý, baılanys jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańyn Májiliske keri qaıtardy.
Zań Senat otyrysynda qaralyp, birinshi oqylymda maquldandy. Alaıda talqylaý barysynda birqatar eskertý men usynys aıtyldy. Qarjy jáne bıýdjet komıteti zańnyń jekelegen baptaryn maquldamaýdy jáne jańa redaktsııasy men zańdy Májiliske qaıtarýdy usynyp otyr. Osyǵan oraı, salystyrmaly kestege 24 túzetý engizilgen.
− Eń aldymen, memlekettik organdardyń aqparattyq júıeleri men kredıttik bıýrolar arasynda merzimdi áskerı qyzmetke shaqyrý týraly aqparatty almasý máselesi bar. Osy túzetý aıasynda azamattyń merzimdi áskerı qyzmetke shaqyrylǵany týraly aqparat bolǵan jaǵdaıda ǵana bankke, jekelegen bank operatsııalaryn júrgizetin uıymǵa jáne mıkroqarjy uıymyna mundaı azamattarǵa nesıe berýge tyıym salynatyny naqtylanady, − dedi Senat depýtaty, Qarjy jáne bıýdjet komıtetiniń hatshysy Sergeı Karplıýk.
Ekinshiden, bank qupııasy men mıkronesıe berý qupııasy bar aqparatqa zańsyz qol jetkizý saldaryn joıý boıynsha shara qabyldaý merzimi naqtylanady. Bul úshin bankterge, keıbir bank operatsııalaryn júrgizetin uıymdarǵa jáne mıkroqarjy uıymdaryna klıentke jáne ýákiletti organǵa habarlaý, zańsyz áreketter men olardyń saldaryn joıý sharalaryn qabyldaıtyn naqty merzimdi belgileý usynylady.
Úshinshiden, baılanys operatorlarynyń antıfrod (alaıaqtyqtyń aldyn alý) júıelerin qurýy úshin quqyqtyq negizder belgilenedi. Usynylǵan túzetý aıasynda Ulttyq banktiń Antıfrod-ortalyǵynyń derekter bazasy men uıaly baılanys operatorlary bazalarynyń ıntegratsııasy reglamentteledi, almasýǵa jatatyn málimetter tizbesi aıqyndalady, sondaı-aq alaıaqtyq belgileri bar qońyraý anyqtalǵan jaǵdaıda baılanys operatorlarynyń áreketteri naqtylady.
− Tórtinshiden, Qazaqstan Respýblıkasynyń rezıdenti bolyp sanalmaıtyn qarjy uıymynyń rezıdent emes bank holdıngi mártebesin alý sharttary naqtylanady. Besinshiden, venchýrlik qorlardyń qyzmetine qatysty memlekettik retteýdiń maqsattary, mindetteri men qaǵıdattary aıqyndalady. «Sottan tys bankrottyq rásimi» uǵymyna ózgerister enip, bul rásim qoldanylatyn adamdardyń toby anyqtaldy, − dedi Sergeı Karplıýk.
Sondaı-aq, úshinshi tulǵalardyń mindettemeleri boıynsha kepilgerler, kepil berýshiler men kepilzat ıeleri bolǵan boryshkerlerdiń kredıtorlar aldyndaǵy mindettemeleri toqtatylmaıtyny týraly ózgeris engizildi.
− Qaralǵan zań Memleket basshysynyń tapsyrmalaryn iske asyrý maqsatymen ázirlengen. Qujat elimizdiń qarjy sektorynyń quqyqtyq rettelýin keshendi túrde jetildirýge baǵyttalǵan aýqymdy túzetýler toptamasyn qamtıdy. Bul túzetýler bank sektoryndaǵy básekelestikti arttyrýda, qundy qaǵazdar men saqtandyrý naryqtaryn odan ári damytýdy kózdep otyr. Osy rette elimizde sheteldik bankterdi tartý úshin ruqsat berý talaptary ońtaılandyryldy. Tutynýshylardyń quqyqtaryn qorǵaýdy jáne alaıaqtyqqa qarsy is-qımyldy kúsheıtýdi kózdeıtin normalardy qarastyryldy. Zańdy qaraý barysynda senatorlar birqatar usynys aıtty. Olar azamattardyń quqyqtaryn qorǵaýdy kúsheıtýge jáne zań normalaryn jetildirýge arnalǵan. Jalpy bul zań elimizdiń qarjy naryǵynyń turaqtylyǵyn ári ornyqty damýyn qamtamasyz etýge oń septigin tıgizedi dep senemiz, − dedi Senat tóraǵasy Máýlen Áshimbaev.
Senat depýtattary zań boıynsha salystyrma kestege engizilgen túzetýlerge daýys berdi. Zańnyń jekelegen baptarynyń jańa redaktsııasy maquldandy. Májilis qabyldaǵan qalǵan baptar da daýysqa salynyp, maquldandy.
Aıta ketelik Senat azamattardyń boryshtyq júktemesin azaıtatyn zańdy talqylaıtyny týraly jazǵan edik.