24 tamyz. QazAqparat kúntizbesi
Halyqaralyq birtúrli mýzyka kúni
Bul erekshe mereke jyl saıyn Nıý-Iorktegi kompozıtor jáne mýzykant Patrık Granttyń bastamasymen atap ótiledi, ol óz shyǵarmalarynda klassıkalyq jáne tanymal mýzykadan bastap post-pankke, embıent pen etnıkalyq mýzykaǵa deıin mýzykanyń ártúrli janrlaryn biriktiredi.
Birtúrli mýzyka kúniniń basty mindeti - mýzykanttar men kompozıtorlardy túrli janr, stılmen tájirıbe jasaýǵa shaqyrý, sonymen qatar tyńdaýshylardy radıo nemese teledıdarda qoıylmaıtyn erekshe mýzykamen tanystyrý.
ESTE QALAR OQIǴALAR
1996 jyly Almaty oblysy Jambyl aýdanynyń Qarakestek aýylynda aqyn Súıinbaı Aronulynyń ádebı-memorıaldyq murajaıy ashyldy.
1998 jyly Qazaqstan Respýblıkasy Prezıdentiniń Jarlyǵymen kompozıtor Nurǵısa Tilendıevke «Halyq Qaharmany» ataǵy berildi.
1999 jyly Bishkek qalasynda «Shanhaı bestigi» sammıtine qatysýshy memleketter - Qazaqstan Respýblıkasy, Qytaı Halyq Respýblıkasy, Qyrǵyz Respýblıkasy, Reseı Federatsııasy, Tájikstan Respýblıkasy basshylarynyń kezdesýi bastaldy. Kezdesý barysynda halyqaralyq jáne aımaqtyq máseleler qaralyp, esirtki tasymaldaryna, separatızmge, dinı ekstremızmge qarsy sharalar talqylandy. Sammıt qorytyndysynda memleket basshylary Bishkek deklaratsııasyna qol qoıdy. Sonymen qatar, N.Nazarbaev, Tszıan Tszemın jáne A.Aqaev memleket shekaralarynyń shektesý núktesi jóninde úshjaqty kelisimge qol qoıdy.
2005 jyly Qazaqstannyń saıası qaıratkeri Imanǵalı Tasmaǵambetovtiń «Kentavry Velıkoı stepı» kitaby Máskeýde ótken TMD-ǵa múshe memleketterdiń «Kitap óneri» atty II halyqaralyq kórmesinde baıqaýdyń bas júldesin jeńip aldy.
2012 jyly Semeıden 50 shaqyrym jerde qazaq halqynyń tarıhyndaǵy belgili batyr - Kúshikbaıǵa eskertkish qoıyldy. Kúshikbaı batyr jońǵarmen soǵysta erlikpen kózge túsken. Onyń sondaı-aq jomarttyǵymen, ádildigimen aty shyqqan.
2012 jyly QR Ulttyq banki aınalysqa nomınaly 500 teńgelik «Álemniń áıgili meshitteri» monetalar serııasynan «Faisal» jáne «Zahir» estelik monetalaryn shyǵardy.
2016 jyly Qazaqstan Prezıdenti Nursultan Nazarbaev resmı saparmen Serbııa astanasy Belgradqa baryp, sapar barysynda Serbııa Pravoslav shirkeýiniń joǵary nagradasy - І dárejeli Qasıetti Savva Ordenimen marapattaldy.
2016 jyly Qazaqstan Prezıdenti Serbııaǵa resmı sapary aıasynda Belgradtyń ortalyq kósheleriniń biriniń boıyndaǵy shaǵyn alańda qazaqtyń uly aqyny Jambyl Jabaevtyń músinin ashty. Jambyl músininiń ashylýyna Serbııa Prezıdenti Tomıslav Nıkolıch, Belgrad meri men qala turǵyndary qatysyp, Almaty oblysy fılarmonııasynyń ánshileri jyrdan shashý shashty.
2016 jyly Halyqaralyq olımpıada komıtetiniń prezıdenti Tomas Bah Gennadıı Golovkınge aıryqsha olımpıadalyq tósbelgisin joldady. Bul Halyqaralyq olımpıada komıtetiniń Gennadıı Golovkınniń sportqa sińirgen eńbegi men álem sportynda qaldyrǵan murasyn moıyndaıtyndyǵynyń belgisi.
2017 jyly Astanada «Qazaqstannyń jańa tarıhı belesi» kórmesinde sırek kezdesetin biregeı materıaldar — meshitter men shirkeýlerdiń kitaptary, XVIII ǵasyrdaǵy Qazaq handyǵy tarıhynan syr shertetin qujattar, olardyń kóshirmeleri, «Alash» partııasy men «Alash Orda» úkimetiniń qyzmetinen maǵlumat beretin qujattar, Maǵjan Jumabaevtyń buryn qupııa saqtalǵan qoljazbasy kórsetildi.
2017 jyly Sh.Chokın atyndaǵy qazaq energetıka ǵylymı-zertteý ınstıtýtynda «Rýhanı jańǵyrý» baǵdarlamasy aıasynda ǵalym-energetık, energetıka ǵylymdarynyń negizin qalaýshy, tehnıka ǵylymdarynyń doktory, professor, akademık Shafık Chokınniń eskirtkishi ashyldy.
2020 jyly Atyraýda altyn jáne kúmis jádigerleri birge jerlengen sırek kezdesetin zırat anyqtaldy. Onyń ereksheligi jerleý orny ekiqabatty. Astyńǵy bóliginen tabylǵan jádirgerler bizdiń dáýirimizge deıingi ekinshi ǵasyr sarmattar kezeńine jatady, al ústińgisi qabattaǵy áldeqaıda keıinirek, XI-XII ǵasyrlarǵa tán.
2021 jyly Moldova Respýblıkasynyń aýmaǵynda alǵash ret aty ańyzǵa aınalǵan «Sherpen platsdarmy» bıiktiginde soǵys jyldary qaza tapqan qazaqstandyq jaýyngerlerge arnalǵan granıt memorıal ashyldy.
2021 jyly Oklahoma-Sıtı qalasynda (AQSh) baıdarka men kanoeda esýden AQSh ashyq chempıonaty ótti, oǵan álemniń jetekshi sportshylary qatysty. Mundaı jarystardyń tarıhynda alǵash ret olarǵa qazaqstandyq baıdarka men kanoede esý mektebiniń ókili Ánýar Akchýrın qatysty, ol 200 metr qashyqtyqta amerıkalyq Gevın Rosspen birge eki adamdyq kanoede jarystyń jeńimpazy atandy.
