24 shákirti álem chempıony atanǵan bapker Túrkistan oblysynda turady
Arman Qarsybaevtyń «Shardara» sport klýby sońǵy kezde qol kúresinen álemdi moıyndatyp júr. Azııa kýbogy jarystarynda 50, Qazaqstan chempıonattarynda 262 altyn medal ıemdengen. Sondaı-aq 32 shákirti álem chempıonatynyń júldegerleri atansa, 26 sportshy Álem kýbogynyń jeńimpazdary boldy.
Bapkerdiń aıtýynsha, bul jetistikterge jetý ońaı bolǵan joq. Jeńister tabandy eńbek pen tynymsyz jattyǵýdyń arqasynda kelgen.
«2000 jyldary, ıaǵnı 23 jasymda Almatydaǵy oqýymdy támamdap, týǵan jerge oraldym. Daıyn turǵan jumys joq. Sodan qarap júrmeı shákitter tárbıeleıin dep sheshtim. Sport zaldaryn jalǵa ala salýǵa qarjy tapshy. Bolmaǵan soń úıimniń mal qorasyn tazalap, retke keltirdim. Jan-jaqtan kádege jaraıdy-aý degen temir-tersekti jınap, qol kúres tobyn qurdym. Kóshemizdegi balalardyń basyn qurap, sporttyń osy túrine baýlı bastadym. Olar da qýana kelisti. Óıtkeni men ol kezde Qazaqstannyń bildeı bir chempıony bolatynmyn. Bastapqyda jattyǵýǵa kerek zattarymyzdy taba almaı qınaldyq. Shtangalardyń ornyna jylý batareıalaryn qoldanǵan kezderimiz de boldy. Qala berse edenge kıiz tósep, sonyń ústinde jattyǵyp júrdik. Birte-birte qatarymyz kóbeıdi»,- deıdi bapker.
Osylaısha mal qoradan bastalǵan jattyǵý júıelenip, orta mekteptiń jertólesinde jalǵasyn tapty. Keıin kele shákirtteri túrli jarystarǵa qatysyp, shaqyrtýlar aldy. Alaıda ol kezeńderde jarystarǵa barý úshin qarajat tapshylyǵy qolbaılaý bolady. 2003 jyly shákirtteriniń biri Seıfolla Nurhalyqov Germanııadaǵy kásipqoılar arasyndaǵy álem kýbogyna shaqyrtý alady. Bapker osy jarysqa jibererde aqshadan qatty qysylǵanyn aıtady.
«Demeýshiler izdep kórip edik, tabyla qoımady. Ol kezde qol kúresi degen sportty kóbisi bile bermeıdi. Sodan 82 shákirtim judyryqtaı jumylyp, 11 kún boıy maqta terdi. Olar aptap ystyqta qara jumystan qashqan joq. Qaıta uıymdasyp, maqtadan túsken aqshaǵa Seıfollany Germanııaǵa jetkizdik. Seıfollamyz da bizdi jerge qaratpady. Sol jarystan jeńispen oraldy. Ózim de 2004 jyly 27 jasymda eń aýyr salmaqta Azııa kýbogynyń jeńimpazy atandym. Sol jyly Azııa chempıonatynyń absolıýtti jeńimpazy boldym. Al, 2005 jyly Tokıoda ótken álem chempıonatynda qola medaldi mise tuttym. «Qazaqstan Respýblıkasynyń halyqaralyq dárejedegi sport sheberi» ataǵyna qol jetkizdim»,- deıdi Arman Qarsybaev.
Bapkerdiń jeńisteri shákirtterin de jigerlendire tústi. 2007 jyly shákirtteriniń biri Jazıra Aqbaeva álem chempıonatynyń jeńimpazy atandy. Erjan Ábilda, Talǵatbek Rústembek, Shynbolat Raıhanov, Qydyrǵalı Ońǵarbaev, Maǵjan Shámıev, Jazıra Aqbaeva, Erdáýlet Nurmahandar eki ret álem chempıondary atanǵan. Azııa chempıonattarynda shardaralyqtar 157 altyn medalǵa ıe bolsa, 128 sportshy qurylyq birinshiliginiń kúmis, qola júldelerine qol jetkizgen. Búginde klýbynan 1 «Qazaqstan Respýblıkasynyń eńbek sińirgen sport sheberi», 57 halyqaralyq dárejedegi sport sheberi, 95 sport sheberi, 2 «Qazaqstan Respýblıkasynyń eńbek sińirgen jattyqtyrýshysy» shyqty. Qazaqstannyń erler quramasynyń negizin de Arman Qarsybaev baptaıtyn Shardara jigitteri qurap otyr.
«Men qazir shákirtterimmen maqtanamyn. Barlyǵy da aýyldyń tárbıesin alǵan. Basym kópshiligi bir kósheniń boıynda turady. Kerek kezde bir jaǵadan bas, bir jeńnen qol shyǵarýǵa daıyn. Klýbtaǵy sportshylardyń basynda bir jaǵdaı bola qalsa, bárimiz bir kisideı kómek kórsetýge tyrysamyz. Kommertsııalyq jarystardan túsken aqshadan da qor jınap, kerek kezde jaratamyz. Osyndaı aýyzbirshiliktiń arqasynda sport keshenin asarlatyp saldyq. Qazir munda 600-deı sportshy jattyǵady. Bizge Túrkistan oblystyq sport basqarmasynyń basshysy Álibek Nurtaev ta únemi qoldaý kórsetip turady»,- deıdi bapker.
Shardaranyń shymyr jigitteri sońǵy úsh jylda da jaqsy nátıjelerge qol jetkizdi. Olardyń arasynda 2015 jyly - Nurdáýlet Aıdarhan, Talǵatbek Rústembek, Shynbolat Raıhanov, Erjan Ábilda Álem chempıonatynda top jardy. Al, 2016 jyly - Nurdáýlet Aıdarhan, Shynbolat Raıhanov, Qydyr Óserbaı, Erdáýlet Nurmahan, Erjan Ábilda,Talǵat Aqtaev álemdik jarysta jeńimpaz atandy. 2017jyly - Nurdáýlet Aıdarhan, Qydyr Óserbaı, Talǵatbek Rústembek, Talǵat Aqtaev, Nurdáýlet Qadyr, Erdáýlet Sarybaı, Nurhan Qadyr, Qaıyrhan Shámıevter dál osy kórsetkishterdi qaıtalaı tústi. Osnaý sportshylardyń arasynan Nurdáýlet Aıdarhan dúnıejúzilik chempıonatta úsh ret jeke-dara shyǵyp, «Qazaqstan Respýblıkasynyń eńbek sińirgen sport sheberi» atandy.