24 naýryzda respýblıka boıynsha qaı joldar jabyq
ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.
Soltústik Qazaqstan oblysynda aýa temperatýrasynyń kúrt joǵarylaýyna jáne qardyń erýine baılanysty jol shamadan tys ylǵaldanyp, topyraq jabyndysynda oıyqtar paıda bolǵan. Bul júk jáne qoǵamdyq kólikterdiń qozǵalysyn qıyndatyp jatyr. Qaýipsizdik maqsatynda «Tımırıazevo – Sarykól – Qostanaı oblysynyń shekarasy» avtojolynyń 0-30-shaqyrym aralyǵynda (Tımırıazevo aýyly – Qostanaı oblysynyń shekarasy ýchaskesi) júk jáne qoǵamdyq kólikterdiń qozǵalysy shekteldi.
Sonymen birge Pavlodar oblysynda «Astana – Shiderti – Pavlodar – Ýspenka – RF shekarasy» avtojolyndaǵy «Qalqaman» jolaıryǵy ýchaskesi (Qalqaman kentine kireberis pen Astana baǵytyna shyǵar jol) jabyq tur.
Shyǵys Qazaqstan oblysyndaǵy Osınov asýynda tirkemesi bar jáne jartylaı tirkemeli júk kólikteriniń qozǵalysy ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qysqy maýsym aıaqtalǵansha saqtalady.
Eske salaıyq, buǵan deıin «Qazgıdromet» sınoptıkteri 24 naýryzda eldiń basym bóliginde qolaısyz aýa raıyna baılanysty eskertý jasaǵan edi.
