24 mln teńge aıyppul: Pavlodarda eks-polıtseıge sot úkimi shyqty

PAVLODAR. KAZINFORM - 25 jasar polıtsııa leıtenanty Qyzylorda oblysynan Pavlodarǵa kelgen. Alaıaqtyq týraly is boıynsha jaýap alý barysynda ol 550 myń teńge talap etken.

Tergeý málimetterine súıensek, Qyzylorda oblysynyń Aral qalasynan kelgen jedel ýákil alaıaqtyq deregi boıynsha kúdiktiden jaýap alǵan. Kúdiktiniń anasymen áńgime barysynda ol 550 myń teńgege máseleni sheshýge kómektesetinin jetkizgen.

Áıel polıtseıdiń usynysyna kelisedi ári sol kúni sybaılas jemqorlyqqa qarsy qyzmetke habarlaıdy. Jas leıtenant para alý kezinde ustaldy.

Qylmystyq is «aıtarlyqtaı mólsherde para alý» baby boıynsha qozǵalǵan. Sot barysynda burynǵy polıtseıdiń advokaty alaıaqtyq deregi boıynsha sottaý kerek dep talap qoıǵan. Biraq sot aıyptalýshyǵa qoldanylatyn jazany alǵashqy bap boıynsha taǵaıyndaýdy jón sanaǵan.

- Qylmystyq kodekstiń 366-baby 2-shi bóligi boıynsha kózdelgen qylmystyq quqyq buzýshylyq jasaǵany úshin kináli dep tanylsyn. Memlekettik qyzmette qyzmet atqarý quqyǵynan ómir boıyna aıyra otyryp, alynǵan paranyń 50 eselengen mólsherinde - 27 mıllıon 500 myń teńge somasynda aıyppul túrinde jaza taǵaıyndalsyn, - dep jarııa etti sot úkimin Pavlodar qalasynyń qylmystyq ister jónindegi aýdanaralyq sotynyń sýdıasy Órnek Abjaparov. 

Polıtsııa qyzmetkeri tergeý barysynda alty aı qamaýda otyrǵan. Sot bul merzim qylmystyq jazany óteıdi degen uıǵarymǵa keldi. Sottalýshy 24 mıllıon teńgeden astam aıyppuldy tóleýi kerek.

Sondaı-aq ol «polıtsııa leıtenanty» sheninen aıyryldy.

Buǵan deıin Pavlodar oblysynda mas kúıinde kólik júrgizgen sheneýnikti jumystan shyǵarý usynylǵan bolatyn.