24 maýsymda Qazaqstannyń birqatar óńirinde aptap ystyq saqtalady
ASTANA.KAZINFORM — «Qazgıdromet» RMK sınoptıkteri 24 maýsymǵa arnalǵan aýa raıy boljamyn jarııalap, qolaısyz meteorologııalyq qubylystar týraly eskertti.
Meteorologtardyń málimetinshe, atmosferalyq fronttardyń ótýine baılanysty elimizdiń basym bóliginde jańbyr jaýyp, naızaǵaı oınaıdy. Keı jerlerde nóser jańbyr, burshaq jáne ekpindi jel kútiledi.
Eldiń ońtústik-batysynda, soltústiginde jáne shyǵysynda shańdy daýyl soǵýy múmkin. Al soltústik óńirlerde túngi jáne tańǵy ýaqytta tuman túsýi yqtımal.
Almaty, Pavlodar, Abaı jáne Jetisý oblystarynda aptap ystyq saqtalyp, aýa temperatýrasy +35...+38 gradýsqa deıin kóteriledi. Almaty oblysynyń soltústiginde kúndiz aýa temperatýrasy +40 gradýsqa deıin jetýi múmkin.
Sonymen qatar birqatar óńirde joǵary jáne tótenshe órt qaýpi saqtalady. Ásirese Qyzylorda, Qostanaı, Aqmola, Pavlodar, Qaraǵandy, Shyǵys Qazaqstan, Almaty, Jambyl, Túrkistan oblystarynda, sondaı-aq Ulytaý, Abaı jáne Jetisý oblystarynda jaǵdaı kúrdeli bolýy yqtımal.
Osyǵan baılanysty turǵyndarǵa órt qaýipsizdigi talaptaryn qatań saqtap, aýa raıynyń qolaısyz qubylystaryna baılanysty saqtyq sharalaryn kúsheıtý usynylady.
Aıta keteıik, Frantsııada aptap ystyqtan úsh adam kóz jumdy.
