24 mamyrynda Baıqońyrdan «Soıýz-2.1a» zymyran-tasyǵyshy ushyrylady

BAIQOŃYR. QazAqparat – Baıqońyr ǵarysh aılaǵynda «Progress MS-23» ǵaryshtyq júk kóligin Halyqaralyq ǵarysh stansasyna (HǴS) ushyrýǵa daıyndyqtyń sońǵy kezeńi bastaldy, dep habarlaıdy QazAqparat tilshisi.

Keshe, 21 mamyr kúni «Progress MS-23» júk kemesi bar «Soıýz-2.1a» ǵaryshtyq maqsattaǵy zymyran montajdaý-synaq korpýsynan shyǵarylyp, Baıqońyr ǵarysh aılaǵynyń 31-shi alańynyń ushyrý keshenine temirjol kóligimen jetkizildi jáne ornatyldy.

Roskosmostyń baspasóz qyzmetinen málim etkendeı, zymyran tik kúıinde ornatylǵannan keıin reseılik ǵarysh salasy kásiporyndarynyń mamandary ǵaryshtyq maqsattaǵy zymyrandy ushyrýǵa daıyndyqty jalǵastyrdy.

«Progress MS-23» júk kemesi bar «Soıýz-2.1a» zymyran-tasyǵyshy Baıqońyr ǵarysh aılaǵynan 2023 jylǵy 24 mamyrda, Astana ýaqytymen saǵat 18 saǵat 56 mınýtta ushyrylady dep josparlanǵan.

«Progress MS-23» ǵaryshtyq júk kóligi HǴS-qa stantsııanyń jumysy men onda jumys isteıtin ǵaryshkerlerdiń ómirin qamtamasyz etý úshin qajetti 2,5 tonnadan astam júkti jetkizýi tıis.

Qazirgi kezde Halyqaralyq ǵarysh stantsııasynda 69-shy uzaqmerzimdi ekspedıtsııanyń ekıpajy jumys istep jatyr. Onyń quramynda Roskosmos ǵaryshkerleri Sergeı Prokopev (HǴS-69 komandıri), Dmıtrıı Petelın jáne Andreı Fedıaev, NASA astronavttary Fransısko Rýbıo, Stıven Boýen, Ýorren Hobýrg jáne BAÁ astronavty Sultan ál-Neıadı bar.