24 qazaqstandyq Qytaıda tegin bilim alady
TALDYQORǴAN.QazAqparat - Aspan asty elinde 24 qazaqstandyq stýdent tegin bilim alady. Sonymen qatar, olarǵa jyl saıyn 12 myń ıýan shákirtaqy tólenedi. Oqý merzimi 3 jyl. Onyń ishinde bir jyly qytaı tilin úırenýge arnalady. Osyndaı tamasha múmkindikke ıe bolǵan jastardy ata-analary men uıymdastyrýshylar Qytaıǵa saltanatty túrde shyǵaryp saldy, dep habarlaıdy QazAqparat tilshisi.
Qazaqstandyq jastar úshin oqý jyly qazan aıynyń sońynan bastalady. Áleýmettik bilim berý jobasy Almaty oblysynyń Kásipkerler palatasy (Palata) jáne Gansý provıntsııasynyń oqý oryndary arasynda iske asty. Ótken jyly oblystyq Kásipkerler palatasynyń bastamasymen QHR provıntsııasynda ekijaqty kezdesý ótip, onyń nátıjesi boıynsha Almaty oblysy stýdentterimen bilim berý baǵyty boıynsha ózara almasý jobasyn iske asyrý jónindegi kelisimge qol jetkizgen bolatyn. Osy jyldyń mamyr aıynda Taldyqorǵanda Kásipkerler palatasy jáne Tszıýtsıýan kásiptik-tehnıkalyq kolledji, Lanchjoý munaı-hımııa kolledji men Lanchjoý resýrstar jáne qorshaǵan orta kásiptik-tehnıkalyq kolledji arasynda memorandýmǵa qol qoıyldy. Kelisim aıasynda «Jumysshy mamandyqtardy Qytaıda meńgereıik» atty áleýmettik bilim berý jobasy iske asyryldy.
«Jobanyń basty ereksheligi - jastar kásiporyndarǵa qajetti mamandyqtardy tegin túrde oqıdy. Atalmysh mamandyqtarǵa elimizde suranys joǵary. Osyǵan deıin qytaılyq kolledjdermen tanysý barysynda olardyń kadr daıyndaý deńgeıine tánti boldyq. Jalpy, Qytaı úshin bul negizgi damý baǵyttarynyń biri bolyp tabylady. Osylaısha olar álem ekonomıkasyndaǵy jetekshi elge aınaldy. Qazaqstandyq stýdentter eń sapaly halyqaralyq bilim alatynyn bolady», - dep atap ótti Almaty oblysy Kásipkerler palatasynyń adamı kapıtaldy damytý bóliminiń basshysy Almagúl Ońǵaraeva.
Kásipkerler palatasyna Qazaqstannyń barlyq óńirinen oqýǵa qatysý úshin 50-den astam ótinim kelip túsken. Qazirgi tańda komıssııanyń irikteýi men suhbattasý kezeńinen Almaty, Qostanaı oblystarynan, sondaı-aq, Almaty jáne Astana qalalarynan 24 jas tańdaldy. Olar týrızm, ІT, taý isi, munaı-hımııa, veterınarııa, dánekerleý isi, munaı jáne gazdy paıdalaný, geologııa, qarjy jáne ekonomıka, metallýrgııa, elektrotehnıka, ınjenerlik ólshemder tehnıkasy mamandyqtary boıynsha bilim alady.
