24 qarashada respýblıka boıynsha qaı joldarda shekteý bar

ALMATY. KAZINFORM – Qazaqstanda 24 qarasha kúni birqatar óńirde joldarda qozǵalys shekteýi saqtalyp otyr. Al endi bir óńirde aýa raıynyń jaqsarýyna baılanysty jyldamdyq rejımi kóterildi.

Ulttyq kompanııanyń málimetinshe, 2025 jylǵy 23 qarashada saǵat 11:00-de Aqmola oblysynda aýa raıynyń jaqsarýyna baılanysty respýblıkalyq mańyzy bar «KAZ02 Astana – Kókshetaý (aınalma jolymen) – Petropavl – RF shekarasy (Jańa Jol beketi)» avtojolynyń 19-231-shaqyrymynda barlyq kólik túri úshin jyldamdyq rejımi 80 shaq/saǵ-tan 110 shaq/saǵ-qa ózgertildi.

Al úsh oblystaǵy joldarda qozǵalys boıynsha shekteý áli de bar.

Pavlodar oblysy

«Astana – Shiderti – Pavlodar – Ýspenka – RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalysqa ýaqytsha shekteý engizildi.

Qalqaman eldi mekeninen Astanaǵa qozǵalys Bereke «Qalqaman – Aqsý» kólik aıryǵy arqyly (uzaqtyǵy 6 shaqyrym) jáne Pavlodar qalasynan Qalqaman eldi mekenine qozǵalys «Baıanaýyl» kólik aıryǵy arqyly júzege asyrylady.

Soltústik Qazaqstan oblysy

«Tımırıazevo – Sarykól – oblys shekarasy» avtojolynyń 0-30-shaqyrymynda (Qostanaı oblysy shekarasy – Tımırıazevo aýyly) kóliktiń barlyq túri úshin shekteý bar.

Shyǵys Qazaqstan oblysy

Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde saqtalady.

Aýa raıy

24 qarashada Aqmola, Qaraǵandy, Shyǵys Qazaqstan, Abaı, Jetisý jáne Pavlodar oblystarynda qar aralas jańbyr men qar jaýady.

– Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, - delingen habarlamada.

Eske salaıyq, Qazgıdromet 24 qarashada aýa raıyna baılanysty 16 óńirde daýyldy eskertý jarııalaǵan edi.