24 aqpanda Qazaqstannyń birqatar óńirinde aýa raıyna baılanysty eskertý jarııalandy

ASTANA. KAZINFORM – «Qazgıdromet» RMK 24 aqpanda elimizdiń 14 oblysynda aýa raıyna baılanysty eskertý jarııalady.

Túnde Jetisý oblysynyń shyǵysyndaǵy taýly aýdandarda tuman túsedi. Soltústik-shyǵystan soǵatyn jeldiń ekpini oblystyń shyǵysynda – 15-20 m/s, keı jerlerde 23-28 m/s deıin jetedi.

Túrkistan oblysynda túnde jáne kúndiz ońtústik, ortalyq jáne taýly aýdandarda jaýyn-shashyn (jańbyr, qar) jaýady, kóktaıǵaq bolady. Oblystyń batysy, soltústigi men ońtústigindegi taýly aımaqtarda tuman kútiledi. Soltústik, batys jáne taýly aýdandarda soltústik-shyǵystan jel soǵyp, ekpini 15-20 m/s bolady. Shymkent qalasynda 24 aqpanda tańerteń jáne kúndiz jańbyr jaýyp, tuman túsedi. Túrkistan qalasynda túnde jáne tańerteń tuman túsedi. Soltústik-shyǵystan soǵatyn jeldiń ekpini 15-20 m/s bolady.

Soltústik Qazaqstan oblysynyń batysy men ońtústiginde tuman túsedi.

Ulytaý oblysynda soltústik-shyǵystan jáne shyǵystan jel soǵyp, ekpini – 15-18 m/s.

Qaraǵandy oblysynyń shyǵysynda túnde qar jaýady, jaıaý burqasyn bolady. Oblystyń batysy, soltústigi jáne ońtústiginde tuman túsedi. Túnde shyǵysta jeldiń baǵyty soltústik-batystan soltústik-shyǵysqa aýysyp, ekpini 15 m/s quraıdy.

Abaı oblysynda túnde jáne tańerteń soltústik, shyǵys jáne ortalyq aýdandarda qar jaýyp, burqasyn júredi, ońtústiginde tuman bolady. Jel batystan jáne soltústik-batystan soǵyp, ekpini 15-20 m/s, keı jerlerde 25 m/s deıin jetedi. Semeı qalasynda 24 aqpanda túngi aýa temperatýrasy -24…-26 gradýs aıazdy kórsetedi. Túnniń birinshi jartysynda qar jaýyp, burqasyn bolady, jeldiń ekpini – 15-20 m/s.

Shyǵys Qazaqstan oblysynda túnde soltústik, shyǵys jáne ońtústik aýdandarda, kúndiz soltústik pen shyǵysta qar jaýyp, burqasyn bolady. Ońtústikte tuman túsedi. Jel batystan jáne soltústik-batystan soǵyp, ekpini 15-20 m/s, keı jerlerde 25 m/s deıin jetedi. Óskemende 24 aqpanda túngi temperatýra -21…-23 gradýs aıazdy kórsetedi. Túnde jáne tańerteń qar jaýyp, burqasyn bolady, jeldiń ekpini 15-20 m/s.

Aqtóbe oblysynyń Muǵaljar aýdanynda jaıaý burqasyn júredi, túnde jáne tańerteń oblystyń ońtústigi men shyǵysynda tuman bolady. Jel ońtústik-shyǵystan jáne shyǵystan soǵyp, ekpini 15-20 m/s.

Batys Qazaqstan oblysynyń batysy, soltústigi jáne ońtústiginde tuman túsedi. Oral qalasynda 24 aqpanda túnde jáne tańerteń tuman bolady.

Qyzylorda oblysynda jel soltústik-shyǵystan soǵyp, túnde jáne kúndiz oblystyń soltústigi men ortalyǵynda ekpini 15-20 m/s bolady.

Qostanaı oblysynyń batysy, soltústigi jáne shyǵysynda tuman kútiledi. Qostanaı qalasynda 24 aqpanda tuman bolady.

Jambyl oblysynyń ońtústik-batysy, shyǵysy jáne taýly aýdandarynda kóktaıǵaq pen tuman bolady. Oblystyń ońtústik-batysy, soltústik-shyǵysy jáne taýly aımaqtarynda soltústik-shyǵystan jel soǵyp, ekpini 15-20 m/s, keı jerlerde 23 m/s deıin jetedi. Taraz qalasynda 24 aqpanda tuman men kóktaıǵaq bolady.

Mańǵystaý oblysynyń batysy, soltústik-shyǵysy jáne ortalyǵynda tuman men kóktaıǵaq kútiledi. Aqtaý qalasynda 24 aqpanda túnde jáne tańerteń tuman men kóktaıǵaq bolady.

Almaty oblysynyń taýly aýdandarynda kúndiz qatty qar jaýady, oblystyń ońtústiginde jáne taýly aımaqtarda tuman men kóktaıǵaq bolady. Jel soltústik-shyǵystan soǵyp, ekpini 18-23 m/s. Almaty qalasynda 24 aqpanda tuman men kóktaıǵaq baıqalady. Qonaev qalasynda da tuman bolyp, jeldiń ekpini 18-23 m/s deıin jetedi.

Buǵan deıin aýa raıynyń qolaısyzdyǵyna baılanysty 7 oblysta kólik qozǵalysy shektelgenin jazǵan edik.