24-25 qazanda Astanada ótetin jármeńkede qandaı ónimder usynylady
ASTANA. KAZINFORM — Astanadaǵy «Qazanat» ıppodromynyń aýmaǵynda Respýblıka kúnine oraı 24-25 qazanda kezekti aýyl sharýashylyǵy jármeńkesi ótedi. Onda Qaraǵandy jáne Qostanaı oblystarynyń taýar óndirýshileri óz ónimderin usynady, dep habarlaıdy elorda ákimdiginiń resmı saıty.
Jármeńke aıasynda eki óńir myń tonnaǵa jýyq aýyl sharýashylyǵy jáne azyq-túlik ónimin ákeledi.
Qaraǵandy oblysynan elordaǵa 583 tonnadan astam ónim jetkiziledi. Onyń ishinde:
• kartop – 310 tonna;
• ettiń barlyq túri – 134,7 tonna;
• kókónis – 80 tonna;
• sút ónimderi – 15 tonna;
• balyq – 7,5 tonna;
• taýyq jumyrtqasy – 310 myń dana;
• bakaleıa ónimderi – 36 tonna.
Qostanaı oblysy 400 tonnadan astam aýyl sharýashylyǵy jáne azyq-túlik óniminiń 100-den astam túrin usynady. Atap aıtqanda:
• ettiń ár túri – 49 tonna;
• sút ónimderi – 31 tonna;
• shujyq ónimderi men etten jasalǵan jartylaı fabrıkattar – 23 tonna;
• jarma jáne makaron ónimderi – 30 tonna;
• kartop pen kókónis – 90 tonna;
• un – 40 tonna;
• nan-toqash jáne kondıterlik ónimder, sýsyndar, bal jáne basqa da taýarlar.
Jármeńkege eki óńirden 140-tan astam aýyl sharýashylyǵy taýaryn óndirýshi men kásiporyn qatysady.
Jármeńkeniń maqsaty – elorda turǵyndaryna sapaly aýyl sharýashylyǵy jáne azyq-túlik ónimderin arzan baǵada usyný, otandyq óndirýshilerdi qoldaý jáne ónimdi deldalsyz, tikeleı óndirýshiden tutynýshyǵa jetkizýdi damytý.
Jármeńke 24-25 qazan kúnderi saǵat 09:00-den 18:00-ge deıin Qarqaraly tasjoly, 1 mekenjaıynda ótedi.
Aıta keteıik, Astanada Qaraǵandy oblysynyń kreatıvti jármeńkesinde 10 mln teńgeniń ónimi satyldy.
