237 mln teńge aıyppul: Túrkistan oblysynda tazalyq talaptaryn buzý tyıylmaı tur
TÚRKІSTAN. KAZINFORM — Túrkistan oblysynda «Taza Qazaqstan» baǵdarlamasy aıasynda qoǵamdyq oryndardyń tazalyǵy men sanıtarlyq jaǵdaıyna qatysty zań buzýshylyqtar boıynsha jyl basynan beri 237 mln teńgeden astam aıyppul salyndy.
Oblysta qoǵamdyq oryndarda tártip buzǵan azamattarǵa qatysty ákimshilik sharalar qabyldanyp jatyr. Alaıda salynǵan aıyppuldyń barlyǵy birdeı ótelmegen.
Máselen, Ákimshilik quqyq buzýshylyq týraly kodekstiń 434-2-baby boıynsha 5746 ákimshilik hattama toltyrylyp, 170,6 mln teńge aıyppul salyndy. Onyń 114,3 mln teńgesi óndirildi. Al 505-bap boıynsha 7978 hattama toltyrylyp, 45,2 mln teńge aıyppul salynǵan. Onyń 31,6 mln teńgesi óteldi.
— Aýyldyq okrýg ákimdikteri tarapynan 505-bap boıynsha 3784 hattama toltyrylyp, 21,5 mln teńge kóleminde aıyppul salyndy. Onyń 11,9 mln teńgesi óndirildi. Bul hattamalardyń 3395-i eskertý bolsa, 389-y aıyppul salýǵa qatysty, — delingen oblys ákimdigi taratqan aqparatta.
Óńirde reıdtik jáne profılaktıkalyq jumystar turaqty túrde júrgizilip jatyr. Jýyrda mobıldi top Jetisaı, Maqtaaral jáne Shardara aýdandaryndaǵy saıabaqtar, skverler men qoǵamdyq oryndardy aralap, tazalyq qaǵıdalaryn buzýdyń 76 deregin anyqtady.
Budan bólek, Shardara jáne Sozaq aýdandaryndaǵy monıtorıng barysynda taǵy 53 kemshilik tirkeldi. Jaýapty tulǵalarǵa olardy joıý úshin merzim berildi.
Buǵan deıin, 22 shildede, Túrkistan oblysynda tazalyq talaptaryn buzǵandarǵa jyl basynan beri 166 mln teńgeden astam aıyppul salynǵanyn jazǵan edik. Qazirgi tańda bul kórsetkish 237 mln teńgeden asty.
Sondaı-aq «Taza Qazaqstan» ekologııalyq aktsııasy aıasynda ǵaryshtyq monıtorıng nátıjesinde oblys aýmaǵynda 250 ruqsatsyz qatty turmystyq qaldyqtar úıindisi anyqtaldy. Zańsyz qoqys oryndarynyń eń kóbi Ordabasy aýdanynda — 53, Arys qalasynda — 48 jáne Keles aýdanynda 37 fakti tirkelgen.
