237 adam qaza tapty: Gazadaǵy áýe shabýyldary Tramp aımaqqa kelgende kúsheıe tústi
ASTANA. KAZINFORM – AQSh prezıdenti Donald Tramptyń Taıaý Shyǵysqa sapary kezinde Izraıl áskeri Gaza sektoryna jappaı áýe shabýyldaryn jasap, 237 palestındik qaza tapty, dep jazady Anadoly.
Tramptyń Saýd Arabııasy, Qatar jáne Birikken Arab Ámirlikterin qamtyǵan sapary bastalǵannan keıin, Izraıl armııasy Gazaǵa baǵyttalǵan áýe soqqylarynyń qarqyndylyǵyn arttyrdy. Sapardyń úshinshi kúni, 15 mamyrda bir kúnde 119 adam kóz jumdy.
Bul jaǵdaı Tramptyń «Gazadaǵy palestındikter jarqyn bolashaqqa laıyq» degen málimdemesimen tuspa-tus bolyp otyr.
2023 jyldyń 7 qazanynan bastap Izraıldiń Gazaǵa jasaǵan shabýyldarynan qaza tapqandardyń jalpy sany 53 010 adamǵa jetse, jaraqat alǵandar sany — 119 998.
Buǵan deıin Izraıl Gazaǵa shabýylyn kúsheıtip, kem degende 65 adam qaza tapqanyn jazdyq.