233 mln teńge jymqyrǵan: Jambyl oblysynda ákimniń eks-orynbasary men 12 býhgalter sottaldy
Jambyl oblysy boıynsha Sybaılas jemqorlyqqa qarsy is-qımyl departamenti Shý aýdany ákiminiń burynǵy orynbasary K.I. Qojaǵappanovaǵa, aýdan ákimdigi bilim bóliminiń bas býhgalteri K. Aǵybaevaǵa jáne 11 býhgalterge qatysty asa iri mólsherde bıýdjet qarajatyn jymqyrý faktisi boıynsha qylmystyq isti aıaqtady.
«Qojaǵappanova bas býhgalter K.S. Aǵybaevamen jáne 11 býhgaltermen aldyn ala sóz baılasý arqyly 2015 jyldan bastap 2018 jylǵa deıingi kezeńde jalpy somasy 233 146 525 teńge bıýdjet qarajatyn aýdan mektepteri muǵalimderiniń jalaqy, eńbek demalysy jáne saýyqtyrý járdemaqysy túrindegi kartochkalyq shottaryna negizsiz aýdarý jáne qolma-qol aqshaǵa aınaldyrý jolymen jymqyrdy degen kúdikke ilindi», - delingen dapartament habarlamasynda.
Sondaı-aq, departament 2020 jyldyń 24 jeltoqsanynda Jambyl oblysy Shý aýdandyq sotynyń úkimi shyqqanyn jetkizdi. Atap aıtsaq, K. Qojaǵappanovaǵa (QR QK 189-b. 4-b. 2-t. boıynsha) 9 jylǵa, K. Aǵybaevaǵa (QR QK 189-b. 4-b. 2-t. boıynsha) 10 jylǵa bas bostandyǵynan aıyrý týraly jáne 11 býhgalterge qatysty túrli sheshimder shyǵyp otyr.
«Qojaǵappanova men Aǵybaeva Shý aýdandyq sotynyń zalynda qamaýǵa alyndy. Qojaǵappanova ómir boıyna memlekettik qyzmette laýazym atqarý quqyǵynan aıyryldy. Qalǵandary ártúrli merzimdermen qarjy ınstıtýttarynda qyzmet etý quqyǵynan aıyrylady», - delingen departament málimdemesinde.