232 qazaqstandyq shetelde «Bolashaq» baǵdarlamasy boıynsha bilim alady
ASTANA. KAZINFORM — Qazaqstan Respýblıkasy Prezıdenti Ákimshiliginiń Basshysy Roman Sklıardyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti. Bul týraly Aqorda málim etti.
Konkýrs qorytyndysy boıynsha respýblıkalyq komıssııa elimizdiń 232 azamatyna «Bolashaq» halyqaralyq stıpendııasyn taǵaıyndaý týraly sheshim qabyldady. Іrikteý kezinde bir orynǵa orta eseppen 5 úmitkerden keldi. Bul baǵdarlamaǵa qyzyǵýshylyq arta túskenin ári básekelestik joǵary bolǵanyn kórsetedi.
— Jańa stıpendıattardyń 179-y magıstratýrada, 12-si doktorantýrada, 1-eýi bakalavrıat baǵdarlamasy boıynsha bilim alady. Budan bólek, 40 adam sheteldik uıymdarda kásibı taǵylymdamadan ótedi, — delingen habarlamada.
Sonymen qatar 33 qazaqstandyqqa sheteldiń aldyńǵy qatarly ýnıversıtetteri men ǵylymı-zertteý ortalyqtarynda taǵylymdamadan ótý múmkindigi berildi. Baǵdarlama otandyq ǵalymdardyń biliktiligin arttyryp, zamanaýı zertteý ádisterin meńgerýine yqpal etip, halyqaralyq ǵylymı yntymaqtastyqty damytýǵa baǵyttalǵan.
Otyrysty qorytyndylaı kele, Prezıdent Ákimshiliginiń Basshysy Roman Sklıar «Bolashaq» halyqaralyq stıpendııasyn odan ári júzege asyrý men jetildirý jóninde naqty tapsyrmalar berdi.
Al «Bolashaq» halyqaralyq stıpendııasy ıegerleriniń tizimin myna siltemeden oqı alasyz.
