2307 áıel IT-Aiel baǵdarlamasy boıynsha IT mamandyqtarǵa oqýǵa ótinish berdi
Baǵdarlama Astana Hub bastamasymen QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııamen birlesip, Tsıfrlyq damý, ınnovatsııalar jáne aeroǵarysh ónerkásibi mınıstrliginiń qoldaýymen iske qosyldy.
Baǵdarlamaǵa qatysýshylar jańa ІT-daǵdylardy 1 tamyzdan bastap onlaın formatta qazaq jáne orys tilderinde meńgere bastaıdy. 2 307 ótinimniń 668-i Astanadan, 371 - Almatydan, 63 - Shymkentten jáne 1205- Qazaqstannyń basqa óńirlerinen túsken.
«Biz baǵdarlamaǵa qyzyǵýshylardyń geografııasy keń ekenin kórip otyrmyz, Qazaqstannyń barlyq óńirinde turatyn áıelder IT-di úırengisi keledi. Baǵdarlama jumysqa ornalaspaǵan áıelder úshin úlken qundylyqqa ıe jáne ol aqparattyq tehnologııalar salasynda áıelder kásipkerligin qoldaý men teń múmkindikter jasaý jolyndaǵy mańyzdy qadam bolyp otyr. Biz qazaqstandyq áıelderdiń kásibı damýǵa jáne elimizdiń aqparattyq tehnologııalar ındýstrııasyna óz úlesin qosýǵa umtylyp otyrǵanyna óte qýanyshtymyz», - dep atap ótti Astana Hub basqarýshy dırektory Alına Abdrahmanova.
Qatysýshylardyń orta jasy-32 jas. Baǵdarlama aıasynda olar aldymen negizgi kompıýterlik saýattylyq kýrsynan, sodan keıin No Code School jáne Freelance School kýrstarynan ótedi. Oqý baǵdarlamasy ártúrli formattardy qamtıdy: beıne dárister, tapsyrmalar, onlaın vebınarlar jáne vorkshoptar.
«Qazaqstan GovTech jáne FinTech salalary damyǵan el jáne aýmaǵynyń úlkendigine qaramastan, Ortalyq Azııa men Shyǵys Eýropa elderi arasynda tsıfrlandyrý jáne ınternetti taratý salasynda aıtarlyqtaı nátıjelerge qol jetkizdi. Osy rette áıelderdiń tsıfrlyq ekonomıkadaǵy kúshi men qabiletine senimdiligin damytý úshin áıelderdiń tsıfrlyq bıznestegi IT-kásipkerligin qoldaý, qarjylyq ıntegratsııany keńeıtý úshin olarǵa tsıfrlyq daǵdylardy úıretý jáne bıznesti basqarý boıynsha oqytýdy yntalandyrý mańyzdy. Áıelderdiń tsıfrlyq ekonomıkaǵa qatysýyn yntalandyrý neǵurlym kúshti ekonomıkalyq ósimge jáne ál - aýqattyń artýyna yqpal etedi»,- dep atap ótti QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Ázıza Shýjeeva.
IT-Aiel baǵdarlamasynyń negizgi quramdas bólikteriniń biri No Code School sanalady, onyń maqsaty qatysýshylarǵa jáne IT-ónimderdi baǵdarlamalaýdy qajet etpesten tez jasaýdy úıretý, sondaı-aq startap-jobalardy qurýdyń jáne olardy durys testileýdiń negizgi prıntsıpterin meńgertý. Baǵdarlama tyńdaýshylary lendıngterdi, saıttardy, mobıldi qosymshalardy, chat-bottardy jáne marketpleısterdi qurýǵa arnalǵan aktýaldy no code quraldaryn zerdeleý boıynsha materıaldardy usynatyn onlaın sabaqtarǵa qol jetkizedi.
«Sondaı-aq biz IT-Aiel baǵdarlamasyna Qazaqstandaǵy frılans-ekonomıkany qoldaý jáne tsıfrlyq alańdarda frılanser áıelderdiń úlesin arttyrý maqsatynda Freelance School kýrsyn engizdik. Frılansıngti oqý áıelderge qashyqtan jumys istep, jalaqy men jumysqa ornalasýdaǵy genderlik alshaqtyqty azaıta otyryp, jergilikti jáne shetel valıýtasynda aqsha tabýǵa múmkindik beredi», - dedi Astana Hub bilim berý baǵdarlamalary keńsesiniń dırektory Dáýlet Beımýrzınov.
Oqý qorytyndysy boıynsha IT-Aiel baǵdarlamasynyń barlyq túlekteri kýrstardyń sátti ótkenin rastaıtyn elektrondyq sertıfıkattar alady. Sondaı-aq, baǵdarlamanyń eń belsendi jáne talantty 100 qatysýshysy Astana Hub-qa sertıfıkattardy saltanatty tapsyrý rásimine shaqyrylady, onda olar óz tájirıbesin jáne ıdeıalaryn bólise alady, sondaı-aq odan ári kásibı damý úshin qoldaý men shabyt taba alady.
