230 myńnan asa elordalyq MÁMS júıesimen qamtylmaǵan
Áleýmettik medıtsınalyq saqtandyrý qorynyń elorda fılıalynyń málimetinshe, 28 aqpanda saqtandyrylǵan turǵyndar sany 1 090 499 bolǵan. 230 091 turǵyn MÁMS júıesimen qamtylmaǵan.
Bul olardyń josparly jáne joǵary tehnologııalyq medıtsınalyq kómek alýyn, aýrýlardyń aldyn alýyn, medıtsınalyq dıagnostıkaǵa qol jetkizýin qıyndatady.
«Áıtse de, MÁMS júıesinde saqtandyrý mártebesi bolmasa da, barlyq azamattar tegin medıtsınalyq kepildendirilgen kómek kóleminde medıtsınalyq (shuǵyl medıtsınalyq kómek, jedel járdem brıgadasyn shaqyrý, ýchaskelik dáriger qabyldaýy, t.b.) kómek ala alady», - dep jazdy vedomstvodan.
Málimetterge súıensek, Astanada birde-bir ret saqtandyrý jarnasyn tólemegen azamattar da bar. MÁMS paketindegi qyzmetterdi, sonyń ishinde baǵasy qymbat medıtsınalyq qyzmet túrlerin paıdalaný úshin, olardyń MÁMS jarnalaryn tólegeni jón. Ol úshin tólem túrin tańdaýy qajet:
1.Eger azamat aldaǵy ýaqyttaǵy bolýy múmkin qajettilikter úshin saqtandyrylǵysy kelse, aı saıyn 3450 teńge mólsherinde Biryńǵaı jıyntyq tólem (BJT) tólese bolady. BJT ótken aılarǵa tóleı almaıdy, sondyqtan aǵymdaǵy aıdan bastap úzdiksiz 3 aıǵa tólese, úshinshi aıda «saqtandyrylǵan» mártebesine ıe bolady.
2. Eger patsıentke jýyq arada MÁMS paketindegi qyzmet qajet bolsa, onda óz betinshe derbes tóleýshi retinde ótken 12 aıdyń ár aıyna 3500 teńgeden tóleıdi.
Esterińizge salamyz, 2022 jyldyń 5 qyrkúıeginen bastap bir jylǵa aldyn ala jarna tóleý arqyly MÁMS júıesine qatysýdyń jańa tetigi iske qosyldy. Ony «saqtandyrylǵan» mártebesi bar, sondaı-aq júıege eshqashan tólem jasamaǵan nemese júıesiz tólem jasaǵan barlyq derbes tóleýshiler paıdalana alady.