23 jyl buryn Kókshetaýda eki áıeldi óltirip, izdeýde júrgen qylmysker ustaldy
KÓKShETAÝ. QazAqparat – Aqmola oblysynyń polıtsııa qyzmetkerleri reseılik áriptesterimen birlesip, 1997 jyldan beri memleketaralyq izdeýde júrgen qylmyskerdi ustady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 1997 jyldyń 30 maýsymynda saǵat 21:00 shamasynda 50 jastaǵy er adam Kókshetaý qalasyndaǵy kópqabatty úılerdiń birinde eki áıelge pyshaq salǵan. Áılderdiń biri sol jerde jan tásilim etse, ekinshisi sol jyldyń 7 shildeside Kókshetaýdaǵy oblystyq aýrýhananyń jansaqtaý bólimshesinde kóz jumdy. Al, osy qylmysqa kúdikti quqyq qorǵaý organdarynan jasyrynyp, onyń boıtasalap júrgen jeri belgisiz bolyp qala berdi.
«Qylmystyń aýyr ekeni eskerilip, tártip saqshylary oǵan halyqaralyq izdeý jarııalady. Ol týraly málimetter kórshi eldiń tártip saqshylaryna joldandy», - deıdi vedomstvodan.
Arada 23 jyl ótken soń 2020 jylǵy jeltoqsannyń 12-de izdeýde júrgen qylmyskerdi Reseıdiń Qorǵan oblysy boıynsha «Kargopolskıı» ÝMVD qyzmetkerleri Jýravleva selosynda jasyrynyp júrgen jerinen ustady. Belgili bolǵandaı, er adam ol jaqta otbasyn quryp, eki balaly bolǵan.
«QR QK 99 babynyń 2 bóligi (QazSSR QK 88 babynyń 1 bóligi Z bólimshesi boıynsha «adam óltirý») boıynsha qylmys jasaǵan er adam Qorǵan oblysy boıynsha «Kargopolskıı» ÝMVD ýaqytsha ustaý oqshaýlaǵyshyna qamaldy. Qazirgi kezde, ony elge qaıtarý máselesi qarastyrylýda», - dep tolyqtyrdy vedomstvodan.
