23 jastaǵy qostanaılyq dúkenge bomba «qoıǵanyn» habarlady
QOSTANAI.QazAqparat – Qostanaılyq tártip saqshylary jalǵan habar taratqan 23 jastaǵy jigitti tergeýge aldy, dep habarlaıdy QazAqparat.
Oblystyq Polıtsııa departamentiniń málimetinshe, búgin saǵat 16.47-de «102» nómirine er adam habarlasyp, Altynsarın kóshesindegi «Azııa» saýda dúkenine jarylǵysh zat qoıylǵanyn aıtqan. «Alaıda ol sálden soń telefon arqyly keshirim surap, jarylǵysh zat týraly habar bermegenin jetkizdi. Osy habarlamany tekserý úshin oqıǵa ornyna arnaıy qyzmetter jumyldyryldy. Dúkennen kúdikti eshteńe tabylǵan joq»,- dedi vedomstvonyń baspasóz qyzmetinen.
Osy derek boıynsha polıtseıler Qostanaı qalasynyń 23 jastaǵy turǵynyn ustady. Tergeý amaldary júrgizilýde.
