23 jastaǵy qyzdyń ólimi: ýchaskelik ınspektor emhanadan shyqqan soń jumystan qýyldy
QARAǴANDY. KAZINFORM — Qaraǵandyda 23 jastaǵy qyzdyń qazasyna qatysty rezonansty iske qatysy bar ýchaskelik ınspektor statsıonardan shyǵarylǵan soń ishki ister organdarynan bosatyldy. Qaıǵyly jaǵdaıdyń naqty sebepteri áli de saraptama qorytyndylary men dárigerlik qupııanyń kóleńkesinde qalyp otyr.
Qalalyq tirek pýnktinde es-tússiz kúıde tabylǵan polıtsııa maıory komadan shyqqanymen, qyzmetine qaıta oralý múmkindigin joǵaltty — ol qyzmetten shettetildi, al onyń jumystan túpkilikti bosatylýy emdeý aıaqtalǵan soń qaralatyn bolady. Maıor tabylǵan bólmege jaqyn jerden 23 jastaǵy qyzdyń denesi anyqtalǵan edi.
Qaıǵyly oqıǵa 29 qyrkúıekke qaraǵan túni bolǵan. Tergeý derekterine sáıkes, sol túni ýchaskelik ınspektor tanysyn qyzmettik úı-jaıǵa ákelgen. Kelesi kúni tańerteń aǵa ýchaskelik ınspektor áriptesin aýyr halde, al qyzdy óli kúıinde taýyp, dereý medıtsına qyzmetkerlerin shaqyrǵan.
Qyzdyń óliminiń mán-jaıy men maıordyń komaǵa túsýine ne sebep bolǵany áli jarııalanbady. Dárigerler bul aqparattyń dárigerlik qupııaǵa jatatynyn aıtsa, polıtsııa saraptamanyń tolyq nátıjesin kútýde. Saraptama qorytyndysy oqıǵanyń kórinbeı turǵan tustaryn ashýy tıis.
Qaraǵandy oblysy Polıtsııa departamentiniń baspasóz qyzmeti vedomstvonyń kez kelgen tártip buzýshylyqqa qatysty «nóldik tózimdilik» qaǵıdatyn qatań ustanatynyn málimdedi. Mıhaılov polıtsııa bóliminiń tirek pýnktinde bolǵan oqıǵa boıynsha qyzmettik tergeý júrgizilip, tártiptik komıssııanyń otyrysy ótken.
Tekserý nátıjesinde bólim bastyǵy men onyń orynbasary laýazymdarynan bosatyldy. Buǵan qosa, Qaraǵandy qalasy Polıtsııa basqarmasynyń jáne oblystyq Departamenttiń birqatar basshylaryna qatysty qatań tártiptik sharalar qoldanyldy.
Vedomstvo málim etkendeı, azamatsha denesiniń tabylýyna baılanysty barlyq mán-jaıdy anyqtaý úshin sotqa deıingi tergeý amaldary júrgizilip jatyr. Al ýchaskelik ınspektor tergeý men emdeý kezeńinde ýaqytsha qyzmetten shettetilgen.
— Buǵan deıin habarlanǵandaı, atalǵan fakt boıynsha sotqa deıingi tergeý amaldary jalǵasýda. Aýrýhanadan shyqqan burynǵy ýchaskelik ınspektor qyzmettik etıka men tártip talaptaryn óreskel buzǵany úshin ishki ister organdarynan teris negizder boıynsha jumystan bosatyldy. Tergeýdiń múddesine sáıkes ózge málimetter jarııalaýǵa jatpaıdy, — dep habarlady Qaraǵandy oblysy PD baspasóz qyzmetinde.
Departament qylmystyq istiń erekshe baqylaýda ekenin atap ótti.