Quryltaı saılaýyna daıyndyqtyń kúntizbelik jospary tanystyryldy
ASTANA. KAZINFORM — QR Ortalyq saılaý komıssııasy tóraǵasynyń orynbasary Muhtar Erman 2026 jylǵy 23 tamyzǵa taǵaıyndalǵan QR Quryltaıy depýtattarynyń saılaýyn ázirleý men ótkizý jónindegi negizgi is-sharalardyń kúntizbelik josparyn tanystyryp ótti.
OSK tóraǵasy orynbasarynyń málimetinshe, Quryltaı depýtattyǵyna kandıdattardy usyný quqyǵy zańda belgilengen tártippen tirkelgen saıası partııalarǵa beriledi. Partııalyq tizimder Ortalyq saılaý komıssııasyna partııanyń joǵary ókildi organynyń tıisti hattamasynyń úzindi kóshirmesimen birge usynylady.
Kúntizbelik josparǵa sáıkes, kandıdattardy usyný kezeńi 2026 jylǵy 2 shildede bastalyp, 13 shilde kúni saǵat 18:00–de aıaqtalady.
— Partııalyq tizimderdi tirkeý rásimi birneshe kezeńnen turady. Atap aıtqanda, kandıdattardyń qujattary qabyldanyp, ýákiletti memlekettik organdarmen birlesip olardyń zań talaptaryna sáıkestigi tekseriledi. Negizgi talaptardyń biri — Qazaqstan Respýblıkasynyń azamattyǵy jáne sońǵy 10 jyl ishinde el aýmaǵynda turaqty turýy, — dedi ol.
Sondaı-aq partııalyq tizimderdi tirkeý 2026 jylǵy 23 shildede saǵat 18:00–de aıaqtalatyny aıtyldy.
Muhtar Ermannyń aıtýynsha, saılaýaldy úgit jumystary partııalyq tizimderdi tirkeý merzimi aıaqtalǵannan keıin bastalyp, 2026 jylǵy 22 tamyz saǵat 00:00–de toqtatylady. Úgit kezeńi jalpy 29 kúnge sozylady.
Budan bólek, saılaý ýchaskeleriniń shekaralary men ýchaskelik saılaý komıssııalarynyń quramy 16 shildege deıin jarııalanady. Al saılaýshylar tizimderi 2 tamyzǵa deıin ýchaskelerge joldanyp, 7 tamyzdan bastap azamattardyń tanysýyna usynylady.
— 2026 jylǵy 22 tamyz — tynyshtyq kúni. Daýys berý 23 tamyz kúni jergilikti ýaqyt boıynsha saǵat 07:00–den 20:00–ge deıin ótedi. Osydan keıin ýchaskelik komıssııalar daýystardy sanaýǵa kirisedi. Quryltaı depýtattaryn saılaýdyń qorytyndylary 10 kún ishinde anyqtalady, — dedi OSK tóraǵasynyń orynbasary.
OSK otyrysynda 2026 jylǵy 23 tamyzǵa taǵaıyndalǵan Qazaqstan Respýblıkasy Quryltaıy depýtattarynyń saılaýyn ázirleý men ótkizý jónindegi negizgi is-sharalardyń kúntizbelik josparyn bekitý týraly qaýly jobasy qabyldandy.
Aıta keteıik, Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy. Quryltaı saılaýy 2026 jylǵy 23 tamyzda ótetini belgili boldy.
Buǵan deıin habarlanǵandaı, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek. Kazinform tilshisi Ata zań aıasynda qabyldanatyn sheshimder men saıası reformanyń halyq ómirine áserin taldady.
