23 sáýirde Astana qalasynda jalpyqalalyq senbilik ótedi
ASTANA. 14 sáýir. QazAqparat /Gúlmıra Álıakparova/ - 23 sáýir kúni Astana qalasynda jalpyqalalyq senbilik ótedi. Elordalyqtar osy kúni respýblıkanyń barlyq óńirinde bir mezgilde, saǵat 11.00-de bastalatyn «Jasyl japyraq» atty jasyl jelek otyrǵyzý aktsııasyna qatysady.
Astana ákimdiginen málim etkendeı, qalany abattandyrý, kógaldandyrý jáne sanıtarlyq tazalaý jumystaryn tıimdi uıymdastyrý úshin ákim orynbasary Vasılıı Krylovtyń basshylyǵymen arnaıy qalalyq shtab quryldy.
Aldyn ala berilgen málimetterge sáıkes, jalpyqalalyq senbilikke 80 myńnan astam adam, jalpy sany 4500 kásiporyn qatysady dep mejelenip otyr. Bul kúni halyqtyń jáne arnaıylandyrylǵan 318 avtomashınanyń kómegimen 1800 túp aǵash pen 23 myńnan astam buta otyrǵyzý josparlanýda.
Aǵashtar men butalardy otyrǵyzýmen qatar gúlbaqsha men gúlzarlardy tazalaý, jasyl jelekterdi otyrǵyzýǵa daıyndaý boıynsha kóktemgi agrotehnıkalyq jumystar júrgiziledi. Sonymen qatar bul kúni Astananyń barlyq aýmaǵyndaǵy sý burqaqtar iske qosylatyn bolady.
Osy kúni el boıynsha bir mezgilde bastalatyn «Jasyl japyraq» jasyl jelek otyrǵyzý aktsııasy Qazaqstan Respýblıkasy Táýelsizdiginiń 20 jyldyǵyna jáne BUU-nyń Bas Assambleıasy bekitken Búkilálemdik Jer kúnine oraılastyrylǵan.
Aıta keteıik, aǵymdaǵy jyldyń 30 sáýirinde kásipkerlik qurylymdar men shaǵyn jáne orta bıznes ókilderi qosymsha kógaldandyrý jumystaryn júrgizip, 3,5 myń aǵash otyrǵyzýdy kózdep otyr.
