23 sáýir. QazAqparat kúntizbesi
ATAÝLY KÚNDER
Búkil dúnıejúzilik kitap jáne avtor quqyǵyn qorǵaý kúni
Bul ataýly kún 1996 jyly UNESCO sheńberinde Ýılıam Shekspır (1564-1616), Mıgel de Servantes (1547-1616) jáne jazýshy-tarıhshy Inko Garsılasode la Vegany (1539-1616) eske alý maqsatynda bekitilgen. Úsh jazýshy da 1616 jylǵy sáýirdiń 23-inde ómirden ótken. Qazir osy ataýly merekege oraılastyryp, barlyq órkenıetti elderde kitap jármeńkeleri, kórmeler men festıvaldar ótkiziledi. Halyqaralyq ataýly kúnniń maqsaty - kitap pen onyń avtorlaryna qurmet kórsetý ǵana emes, halyqty aǵartý, mádenı dástúrler sanasyn damytý bolyp tabylady.
Túrkııa Respýblıkasynyń ulttyq egemendik jáne balalar kúni
1919 jyly Mustafa Kemal Atatúrik bastaǵan túrik halqy Túrkııanyń táýelsizdigi úshin soǵysty bastady. 1920 jyly 23 sáýirde Ankarada Túrkııanyń parlamenti – Uly ulttyq Májilisi quryldy. Qazaqstan Respýblıkasy men Túrkııa arasyndaǵy dıplomatııalyq qarym-qatynas 1992 jylǵy 2 naýryzda ornatyldy.
ESTE QALAR OQIǴALAR
2004 jyly Astana qalasynda Qazaqstan Respýblıkasynyń Ulttyq akademııalyq kitaphanasy quryldy. Onyń bas dırektory bolyp professor, tarıh ǵylymdarynyń kandıdaty Roza Amanǵalıqyzy Berdiǵalıeva taǵaıyndaldy.
2009 jyly Qazaqstan Prezıdenti «Qazaqstan Respýblıkasyndaǵy merekeler týraly» Qazaqstan Respýblıkasynyń Zańyna ózgerister engizý týraly» Zańǵa qol qoıdy. Zań Naýryz meıramyn merekeleý kúnderin úsh kúnge - naýryzdyń 21-nen 23-ne deıin ulǵaıtýdy jáne Qazaqstan Respýblıkasy kúnin (25 qazan) merekeleýdi alyp tastaýdy kózdegen.
2010 jyly Qazaqstan Respýblıkasynyń Ulttyq kitaphanasynda «Telelıft» júıesi ornatyldy. Bul Ortalyq Azııadaǵy alǵashqy osyndaı kitaphana. Sonyń arqasynda qorda saqtaýly turǵan kitaptar birneshe mınýttyń ishinde oqý zalyna jetkiziledi.
2017 jyly Brıýsselde ótken jas pıanınoshylardyń Merci, Maestro! halyqaralyq baıqaýynda Qazaq ulttyq óner ýnıversıtetiniń tárbıelenýshisi Bıálı Bıkenov «Eń jas oryndaýshy» sanatynda laýreat atandy.
2018 jyly Beıjińde «Baldyrǵan» balalardy damytý ortalyǵynyń resmı ashylý rásimi ótti. Bul sheteldegi qazaq tilinde bilim beretin alǵashqy jeke ortalyq.
2019 jyly Jeńil atletıkadan Dohada ótken Azııa chempıonatynda 400 metrge júgirýden erler arasyndaǵy báseke aıaqtaldy. Eki kún ishinde qazaqstandyq jelaıaq elimizdiń eki rekordyn ornatty. Jartylaı fınaldyq jarysta ol atalǵan qashyqtyqty 45,38 ýaqyt kórsetkishinde júgirip ótken. Lıtvın 400 metrdi 45,25 sekýndta baǵyndyrdy. Bul Qazaqstannyń jańa rekordy. Budan basqa 100 metrge jarysýdan áıelder arasyndaǵy básekede qazaqstandyq Olga Safronova Azııa chempıony atandy. Ol atalǵan qashyqtyqty 11:17 sekýndta júgirip ótip, qurlyq dodasynyń jańa rekordyn ornatty.
2021 jyly «Dúnıejúzi qazaqtarynyń qaýymdastyǵy» men «Tatarlardyń dúnıejúzilik kongresi» halyqaralyq odaǵy yntymaqtastyq týraly memorandýmǵa qol qoıdy.
Memorandýmnyń basty maqsat – eki el arasyndaǵy baýyrlastyq dostyqty nyǵaıtý jáne Reseı Federatsııasynyń Tatarstandaǵy qandastarǵa bilim, mádenıet salasynda kómek qolyn sozý.
2022 jyly Jenevada Qazaqstan Respýblıkasy Násildik kemsitýshiliktiń barlyq nysandaryn joıý týraly halyqaralyq konventsııanyń oryndalýy týraly segizinshi-onynshy jıyntyq merzimdi baıandamany sátti qorǵady. Konventsııaǵa qosyla otyryp, Qazaqstan násildik kemsitýshilikti onyń barlyq nysandary men kórinisterinde joıýǵa, násiline, túsine, ulttyq nemese etnıkalyq tegine qaramastan, árbir adamnyń zań aldyndaǵy teńdigin qamtamasyz etýge mindetteme aldy.
