23 naýryzda «Móldir bulaq» respýblıkalyq aktsııasy bastalady
ASTANA. KAZINFORM — 1,6 mlrd aǵash otyrǵyzyldy, 1 mln gektardan astam alqapta melıoratsııalyq orman jumystary júrgizildi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Memleket basshysynyń «Taza Qazaqstan» bastamasyn júzege asyrý barysyna monıtorıng júrgizý ortalyǵynyń otyrysyn ótkizdi. Onda kógaldandyrý, onyń ishinde orman alqaptaryn qurý, óńirlerde ekologııalyq jobalardy júzege asyrý máseleleri qaraldy.
— Prezıdentimizdiń «Taza Qazaqstan» bastamasynyń negizgi qaǵıdattary, onyń ishinde halyqtyń ekologııalyq mádenıetin qalyptastyrý, qorshaǵan ortany qorǵaý, tabıǵatqa uqypty qaraý sııaqty negizgi qundylyqtar elimizdiń jańa Konstıtýtsııasynda naqty bekitilgen. Tabıǵatty qorǵaý — qur sóz emes, ol barshamyzdyń ortaq konstıtýtsııalyq boryshymyz.
Eriktiler uıymdary men jastardyń áleýetin paıdalanýymyz kerek. Olardyń belsendi qatysýy tabıǵatqa qamqorlyqpen qaraýdaǵy sabaqtastyqty qamtamasyz etedi. Biz Konstıtýtsııada bekitilgen jańa ekologııalyq mádenıettiń negizin qalaımyz.
Aral teńizi aımaǵynda aǵash otyrǵyzý jáne ekologııalyq ahýaldy jaqsartý boıynsha júrgizilip jatqan aýqymdy jumystar Memleket basshysynyń ekologııany qalpyna keltirý jáne saqtaý, qaýipsiz qorshaǵan ortany damytý qaǵıdattaryna degen berik ustanymyn kórsetedi. Qazir onda sekseýil alqaptary egilýde. Olar tuzdy daýyldarǵa tosqaýyl bolyp, óńirdiń ekojúıesin qalpyna keltirýge yqpalyn tıgizedi, — dep atap ótti Oljas Bektenov.
Ekologııa jáne tabıǵı resýrstar mınısri Erlan Nysanbaev elimizdegi orman qory jáne Aral teńiziniń qurǵaǵan túbine aǵash otyrǵyzý jumystarynyń barysy týraly baıandady. Jergilikti atqarýshy organdarǵa erekshe júktelip, ekologııalyq is-sharalardy ótkizý, aýmaqtardy abattandyrý, ruqsat etilmegen qoqys oryndaryn joıý jáne «Taza Qazaqstan» bastamasyn júzege asyrýǵa halyqty ekologııalyq aktsııalarǵa tartý jumystaryn uıymdastyryp, úılestirýi tıis ekeni atap ótildi. Osy oraıda Aqmola, Shyǵys Qazaqstan, Qyzylorda, Mańǵystaý, Ulytaý oblystarynyń jáne Shymkent qalasynyń ákimderi baıandama jasady.
Ekologııa jáne tabıǵı resýrstar mınıstrliginiń derekteri boıynsha 2021-2025 jyldar aralyǵynda respýblıkada shamamen 1,6 mlrd aǵash otyrǵyzyldy, al bıyl 210 mln-nan astam kóshet egý josparlanýda. Jalpy aýdany 2,7 myń gektar bolatyn 243 orman tálimbaǵynda shamamen 157 mln kóshet ósirilip jatyr. Osy jyly taǵy 6 jobany júzege asyrý josparlanýda, olardyń árqaısysynyń óndiristik qýaty jylyna 6 mln kóshet.
Aral óńiriniń ekojúıesin qalpyna keltirý sheńberinde 2021-2025 jyldary melıoratsııalyq orman jumystary 1 mln gektardan astam alqapta júrgizildi, al qazirgi ýaqytta 165 myń gektar alqapta jalǵasyp jatyr. Ǵylymı súıemeldeýdi qamtamasyz etý maqsatynda óńirde Qazaq orman sharýashylyǵy jáne agroorman melıoratsııasy ǵylymı-zertteý ınstıtýtynyń fılıaly quryldy. Aral teńiziniń qurǵaǵan túbinde tálimbaq qurylysy júrgizilip jatyr. Sonymen qatar «Aral Ormany» memlekettik tabıǵı rezervatyn qurý aıaqtalýda.
Premer-mınıstr memlekettik organdar men ákimdikterdiń nazaryn málimdelgen josparlardy oryndaýǵa ǵana emes, sondaı-aq egilgen aǵashtardyń kóp kólemde jersinip ketýin qamtamasyz etý qajettigine de aýdardy. Osyǵan baılanysty Ekologııa jáne tabıǵı resýrstar mınıstrligi ákimdiktermen birlesip, kóshetterdiń jersinip ketýin mindetti túrde qadaǵalaı otyryp, bıylǵa josparlanǵan otyrǵyzý kólemin júzege asyrýdy qamtamasyz etýi tıis. Sondaı-aq, Memleket basshysy jarııalaǵan tsıfrlandyrý jylyn eskere otyryp, jerdi qashyqtyqtan zondtaý, drondar men JI elementteri syndy tsıfrlyq sheshimderdi belsendi engizý tapsyryldy. Bylǵy sáýir aıynyń sońyna deıin Qyzylorda jáne Túrkistan oblystaryndaǵy Aral teńiziniń qurǵatylǵan túbiniń 165 myń alańynda melıoratsııalyq orman jumystaryn aıaqtaý mindeti qoıyldy.
Orman tálimbaqtary jelisin damytýǵa erekshe nazar aýdarylýda. Premer-mınıstr Almaty, Qostanaı, Pavlodar, Shyǵys Qazaqstan jáne Abaı oblystarynda orman tálimbaqtary qurylysyn jedeldetýdi jáne aldaǵy ýaqytta óńirlerde sapaly kóshet qorynyń bolýy úshin jabyq ósirý júıesi bar kóshetterdi ósirýdiń ornyqty júıesin qurýdy qamtamasyz etýdi tapsyrdy.
Odan basqa qaldyqtardy kádege jaratý máseleleri qaraldy. Búgingi tańda 185 mlrd teńgege jeńildetilgen qarjylandyrý qarastyrylǵan bolsa, sonyń ishinde 90 mlrd teńgeden astam somaǵa 26 joba júzege asyrylýda. Ákimdikterge josparlanǵan is-sharalardyń ýaqtyly oryndalýyn qamtamasyz etý, sondaı-aq jer qoınaýyn paıdalanýshylarmen birlesip, karerler aýmaqtarynyń 40%-dan astamyn, onyń ishinde sanıtarııalyq qorǵaý aımaqtarynyń shekaralarynda kógaldandyrý jumystaryn júrgizý tapsyryldy.
23 naýryzda «Móldir bulaq» respýblıkalyq aktsııasy bastalady, onyń sheńberinde bulaqtar men jaǵalaý aýmaqtaryn tazartý, sondaı-aq 700-den astam áleýetti sý nysandaryn túgendeý josparlanýda.
«Taza Qazaqstan» bastamasyn odan ári júzege asyrý osy jylǵa arnalǵan ekologııalyq aktsııalardyń jańa tsıkliniń kestesine sáıkes júrgiziledi.
Jıynda Óńirlik ekologııalyq sammıtke daıyndyq barysy da qaraldy. Іs-shara ekologııa salasyndaǵy halyqaralyq yntymaqtastyqty damytý úshin mańyzdy alańǵa aınalatyny atap ótildi.
Aıta ketelik «Taza Qazaqstan»: onlaın-platformaǵa astanalyqtardan 3 600-den astam ótinim túsken edi.