23 myń qazaqstandyqtyń eńbek quqyǵy qorǵaldy
NUR-SULTAN. QazAqparat - 23 myń qazaqstandyqtyń eńbek quqyǵy qorǵaldy. Bul týraly búgin halyqpen eseptik kezdesý ótkizip jatqan Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.
«Eńbek zańnamasynyń saqtalýyna monıtorıng jáne baqylaý júrgiziledi. Bul úshin Eńbek qaterleri kartasy qoldanylady. Onda eńbek zańnamasyn kóp buzǵan kásiporyndar esepke alynady. Onyń kómegimen 2019 jyly eńbek ınspektsııasy teksergen 3,9 myń kásiporynda 5 myńnan astam buzýshylyq joıyldy. Nátıjesinde 23 myńnan astam jumyskerdiń eńbek quqyǵy qorǵaldy. Olarǵa 3 mlrd teńge jalaqy bereshegi tólendi», - dedi mınıstr.
Onyń aıtýynsha, 2019 jyly eńbek daýlaryn aldyn alý jónindegi is-sharalar jospary jáne eńbek qaýipsizdigi men eńbekti qorǵaýdy qamtamasyz etý jónindegi sharalar iske asyrylyp jatyr.
«1,7 myńnan astam kásiporyn halyqaralyq standarttardy engizdi, 6 myńnan astam óndiristik nysan attestattaldy. Kásiporyndarda ishki baqylaýdy 15 myńǵa jýyq óndiristik keńes júzege asyrady. Nátıjesinde óndiristik jaraqattanýdyń tómendeýi baıqalady. 2019 jyldyń 5 aıynda jazataıym oqıǵalar sany 10,2 paıyzǵa tómendedi, zardap shekkender sany azaıdy», - dedi ol.
B.Saparbaevtyń aıtýynsha, laıyqty eńbek jaǵdaılaryn jasaý boıynsha jumys kúsheıtildi. 2019 jyly mınıstrlik áleýmettik áriptestermen jáne ákimdiktermen birlesip «Qaýipsiz eńbek» uranymen keń aýqymdy túsindirý jumystaryn júrgizýde. Óndiristik jaraqattanýdy jáne eńbek jaǵdaılary zııandy jáne qaýipti jumys oryndaryn azaıtý jónindegi jańa Jol kartasyn iske asyrý bastalady.
Sondaı-aq, ol áleýmettik áriptestik júıesi belsendi damyp kele jatqanyn aıtty.
«Qyzmetkerlerdiń eńbek quqyqtarynyń qysqarýyna jáne buzylýyna jol bermeý úshin ákimdikter men óńirlerdegi kásiporyndar arasynda 122,4 myń yntymaqtastyq týraly memorandým jasaldy. Іri jáne orta kásiporyndardyń 96,4 paıyzy jáne shaǵyn kásiporyndardyń 39,9 paıyzy ujymdyq sharttarmen qamtylǵan. Osylaısha, osy kásiporyndardyń qyzmetkerlerine qosymsha áleýmettik paket kózdelgen», - dedi B.Saparbaev.
Mınıstr kóptegen iri kásiporyndarmen, bıznes qaýymdastyq ókilderimen qosymsha demeýshilik jáne qaıyrymdylyq kómek kórsetý boıynsha ýaǵdalastyqqa qol jetkizilgenin atap ótti.
«Aǵymdaǵy jyly óńirlerde halyqtyń áleýmettik osal sanatyn, onyń ishinde kópbalaly analardy qoldaý boıynsha 38,3 mlrd teńgeden artyq somaǵa 458 memorandým jasaldy. Balalary bar az qamtylǵan otbasylardy, jetim balalardy turǵyn úımen qamtamasyz etý úshin otbasy úlgisindegi jataqhanalardy, jalǵa beriletin turǵyn úılerdi salý máselesi sheshilýde. Aǵymdaǵy jyldyń basynan beri kópbalaly otbasylarǵa demeýshilerdiń esebinen 385 páter berildi», - dedi mınıstr.
