23 mln tonna astyq bastyrylyp, eksport 13 paıyzǵa artty
ASTANA. KAZINFORM — Bıyl 9 aıda medıtsına men bilim salasynda 57 mlrd teńgeden astam bıýdjet qarajaty únemdeldi. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov aıtty.
— Osy jyldyń 9 aıynyń qorytyndysy boıynsha ósimdik sharýashylyǵy salasynda oń nátıjelerge qol jetkizildi. Búgingi tańda 23 mln tonna astyq bastyryldy. Vegetatsııa kezeńindegi kúrdeli klımattyq jaǵdaılarǵa jáne bıdaı egis alańyn 1,8 mln gektarǵa josparly qysqartýǵa qaramastan, astyqtyń jalpy túsimi kópjyldyq ortasha deńgeıden joǵary bolady dep boljanady. Maıly daqyldardy jınaý jumystarynyń qarqyny da artyp keledi. Búgingi tańda 3,7 mln tonna maıly daqyl tuqymy bastyryldy. Bul ótken jylǵy kórsetkishten 2,5 ese joǵary, — dedi ol.
Vıtse-mınıstrdiń aıtýynsha, jıyn-terim qorytyndysynda maıly daqyldar tuqymynyń kólemi rekordtyq mejeden — 5 mln tonnadan asady dep kútiledi.
— Kókónis daqyldary boıynsha da joǵary kórsetkishterge qol jetkizildi. Búgingi tańda 3,1 mln tonna kókónis, 2,9 mln tonna kartop jáne shamamen 2,4 mln tonna baqsha daqyldary jınaldy. Bıyl dándi jáne dándi-burshaq daqyldarynyń jalpy jınaý alańy 15,6 mln gektardy quraıdy. Búgingi tańda egis alqaptarynyń 96 paıyzy jınaldy. Ortasha ónimdilik gektaryna 15,2 tsentnerden quraıdy, — dedi vıtse-mınıstr.
Onyń dereginshe, negizgi astyq egetin óńirlerdegi ortasha ónimdilik Soltústik Qazaqstan oblysynda gektaryna 17 tsentnerdi, Aqmola oblysynda 14 tsentnerdi jáne Qostanaı oblysynda 14,2 tsentnerdi quraıdy. Bıyl astyq sapasynyń joǵary ekeni baıqalady. Elevatorlarǵa túsken bıdaıdyń 72,4 paıyzdan astamy úshinshi synypqa jatady.
— Jańa ónim astyǵy eksportynyń oń dınamıkasyn da atap ótken jón. Qyrkúıek aıynyń qorytyndysy boıynsha eksport kólemi 1,1 mln tonna qurady. Bul ótken jyldyń osyndaı kezeńindegi kórsetkishten 13 paıyzǵa joǵary. Osyǵan baılanysty astyq qabyldaý kásiporyndarynyń úzdiksiz jumysyn qamtamasyz etý, astyqty ýaqtyly jóneltý jáne qolda bar logıstıkalyq qýattardy tıimdi paıdalaný mańyzdy, — dedi ol.
