23 mln teńgege aldaǵan: Astanada avtosalon menedjeri sottaldy
ASTANA. KAZINFORM- Elordada qaladaǵy avtosalondardyń birinde satý jónindegi menedjer bolyp jumys istegen er adam paıdakúnemdik maqsatta aldaý jáne senimge qııanat jasaý arqyly qala turǵyndaryna tıesili eki avtokólikti zańsyz ıemdengen, dep habarlaıdy Astana qalylyq prokýratýrasynyń baspasóz qyzmeti.
Jábirlenýshiler ózderine tıesili «Changan CS55 Plus» jáne «Toyota Camry» avtokólikterin ári qaraı satý úshin avtosalonǵa tapsyrǵan. Keıin er adam kólik ıelerine avtokólikterge satyp alýshy tabylǵanyn aıtyp, aqshasy birneshe kún ishinde aýdarylatynyna sendirip, kólikterdi úshinshi tulǵanyń atyna qaıta rásimdeýge kóndirgen.
Avtokólikter qaıta rásimdelgennen keıin sottalýshy olardy satýdan túsken aqshalaı qarajatty óz qalaýynsha jumsaǵan.
Zańǵa qaıshy áreketterdiń saldarynan jábirlenýshilerge jalpy somasy 23 mln teńge kóleminde materıaldyq zalal keltirilgen.
Memlekettik aıyptaýshy sotta sottalýshynyń kinásin tolyq dáleldeıtin jetkilikti aıǵaqtardy usyndy. Sot otyrysynda ol óz kinásin tolyq moıyndap, jasaǵan isine ókinish bildirdi.
Sot úkimimen sottalýshy kináli dep tanylyp, oǵan 3 jyl 4 aı merzimge bas bostandyǵynan aıyrý jazasy taǵaıyndaldy.
Jábirlenýshilerdiń materıaldyq zalaldy óndirý týraly azamattyq talaptary qanaǵattandyryldy. Sot úkimi zańdy kúshine endi.
Qala prokýratýrasy menshikke qarsy qylmystar jasaǵany úshin múlki tárkilenip, 7 jylǵa deıin bas bostandyǵynan aıyrý jazasyna deıin qylmystyq jaýaptylyqtyń kózdelgenin eske salady jáne azamattardy zań talaptaryn saqtaýǵa shaqyrady.
Osyǵan deıin sheteldik nómirli kólikpen zańsyz júrgenderge qatysty jaýapkershilik týraly jazdyq.
