23 myńnan astam derekter tsıfrlandyryldy: Sý resýrstarynyń ulttyq aqparattyq júıesi ázirlendi
ASTANA. KAZINFORM – Sý resýrstary jáne ırrıgatsııa mınıstrligi sý nysandary, sý sharýashylyǵy ınfraqurylymy, sý paıdalanýshylar, jerasty sýy jáne salanyń ózge de baǵyttary boıynsha derekterdi biriktiretin Sý resýrstarynyń ulttyq aqparattyq júıesin (SRUAJ) ázirledi.
Júıeniń negizgi maqsaty – basqarýshylyq sheshimder qabyldaýǵa qajetti biryńǵaı, senimdi ári ózekti derekter bazasyn qalyptastyrý. Búginde júıede 23 myńnan astam sý nysany týraly málimet tsıfrlandyrylyp, júıelendirildi.
Onyń ishinde 17 748 ózen, 3 148 kól jáne 1 109 gıdrotehnıkalyq qurylysjaı bar. Sonymen qatar Sý resýrstarynyń ulttyq aqparattyq júıesinde 3 myńǵa jýyq uıym men 4 myńnan astam paıdalanýshy tirkelgen. Júıege sý sharýashylyǵy jáne gıdrotehnıkalyq nysandardyń 9 myńǵa jýyq tsıfrlyq pasporty engizildi.
Sondaı-aq júıe arqyly sýdy bastapqy esepke alý boıynsha 2,2 myńnan astam esep, al 2-TP nysany boıynsha 1,3 myńnan astam esep qabyldanǵan.
– Júıeniń fýnktsıonaldyq múmkindikterine sý balansyn júrgizý, sý paıdalanýdy esepke alý jáne taldaý, sý qoımalarynyń jaı-kúıin monıtorıngileý, transshekaralyq sý nysandary boıynsha derektermen jumys isteý, sondaı-aq ǵaryshtyq monıtorıngti qosa alǵanda, zamanaýı tehnologııalardy paıdalaný kiredi. Qazirgi ýaqytta Sý resýrstarynyń ulttyq aqparattyq júıesi ónerkásiptik paıdalanýǵa engizýge daıyndyqtyń sońǵy kezeńinde tur, – dedi «Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýlla.
Elimizde 1,9 myń shaqyrym sý qubyry jańartylatynyn jazǵan edik.
