2,3 myń adam kásibı biliktiligin arttyrý kýrsynan ótti

ASTANA. KAZINFORM — Jyl basynan beri 2,3 myń adam kásiptik biliktilikti taný rásiminen ótý múmkindigin paıdalandy. Bul rásim resmı emes jáne ınformaldy bilim berý arqyly alynǵan bilim men daǵdylardy rastap, eńbek naryǵyndaǵy básekege qabilettilikti arttyrýǵa kómektesedi. Bul týraly Eńbek jáne halyqty áleýmettik qorǵaý mınıstrligi málim etti

Biliktilikti taný kásibı standarttarǵa negizdelip júzege asyrylady jáne úmitkerdiń naqty kásipke qoıylatyn talaptarǵa sáıkestigin baǵalaýǵa múmkindik beredi.

— Qazirgi ýaqytta kásiptik biliktilikti tanýǵa arnalǵan Kásipter tizilimi  memlekettik organdardyń usynystary eskerile otyryp, ekonomıka salalary boıynsha iriktelgen 749 kásipti qamtıdy. Sonyń ishinde 134 kásip boıynsha biliktilikti taný mindetti túrde júzege asyrylady, al 615 kásip boıynsha — erikti negizde ótkiziledi, — delingen habarlamada.

Erikti túrde biliktilikti tanýǵa ótinishter Ulttyq biliktilik júıesiniń Career Enbek (budan ári — Career Enbek) tsıfrlyq platformasynda rásimdeledi. Sondaı-aq osy platformada kásiptik biliktilikti taný ortalyqtarynyń (budan ári — taný ortalyǵy) birin tańdap, rásimnen ótýge bolady.

Búgingi tańda Career Enbek platformasynda aqparattyq tehnologııalar, aýyl sharýashylyǵy, týrızm, qonaq úı bıznesi jáne basqa da salalar boıynsha 63 kásipti (erikti túrde rastalatyn) qamtıtyn 9 taný ortalyǵy akkredıttelgen.

Vedomstvonyń málimetinshe, jumyssyz azamattarǵa kásiptik biliktilikti taný rásiminen tegin ótý múmkindigi beriledi. Ol úshin úmitker Career Enbek platformasynda Tizilimnen bir kásipti jáne qolaıly taný ortalyǵyn tańdap, ótinish berýi qajet. Oń sheshim qabyldanǵan jaǵdaıda úmitkerdiń jeke kabınetinde 45 kúntizbelik kún ishinde qoldanýǵa bolatyn elektrondyq vaýcher paıda bolady.

Jumysshy mamandyqtar jyly aıasynda kásiptik biliktilikti taný ortalyǵynyń jelisin keńeıtý boıynsha belsendi jumys júrgizildi. Jyl sońyna deıin Eurasian Resources Group kompanııasymen birlesip, halyqaralyq standarttarǵa negizdelgen jáne tıisti taný rásimderin engizýdi kózdeıtin 3 ortalyqty Aqtóbe, Qostanaı jáne Pavlodar oblystarynda ashý josparlanyp otyr.

Sondaı-aq kásiptik biliktilikti taný ortalyqtaryn 10 birqatar iri kompanııalarmen jáne qaýymdastyqtardyń bazasyna engizý maqsatynda («Allur», «Qaz Textile Industry», «Qarmet», «QazMunaıGaz», «QazAtomProm», «Qazaqmys», «Qazaqtelekom», «QazaqstanTemirJoly», KazGROW, HR sertıfıkattaý ortalyǵy jáne t. b. sekildi) mashına jasaý, energetıka, metallýrgııa, kólik jáne logıstıka, munaı-gaz hımııasy, aýyl sharýashylyǵy jáne basqa da salalar boıynsha jumystar júrgizilip jatyr.

Jańa ortalyqtardyń qurylýy resmı emes jáne (nemese) ınformaldy bilim berý arqyly alynǵan biliktilikterdi obektıvti baǵalaýdy qamtamasyz etedi. Bul jumyskerlerdyń daǵdylarynyń jumys berýshilerdiń talabyna saı ekendigin, sonyń ishinde halyqaralyq standarttarǵa sáıkestigin rastaýǵa múmkindik beredi jáne olardyń jahandyq eńbek naryǵyndaǵy básekege qabilettiligin arttyrady.

Aıta keteıik, Qazaqstanda bıyl 269 myńnan astam adam jumyspen qamtyldy.