23 maýsymda dúnıege kelgen sábılerge olımpıadalyq jıyntyq tapsyrylady
ASTANA KAZINFORM — Qazaqstan Ulttyq Olımpıadalyq komıteti «Olımpıada kúninde týǵan» aktsııasyn altynshy ret ótkizip otyr.
Halyqaralyq Olımpıada kúnine oraı uıymdastyrylǵan bastama bıyl altynshy ret júzege asyrylyp otyr. Joba ıÝNISEF-pen birlesip qolǵa alynǵan.
Dástúr boıynsha 23 maýsym kúni dúnıege kelgen árbir sábı arnaıy syılyqtarǵa ıe bolady. Jańa týǵan nárestelerge quttyqtaý hattary men «Olympian is born» jazýy bar estelik kıim jıyntyqtary tabystalady.
Bıyl Astanada sábılerge arnalǵan syılyq jıyntyqtaryn short-trekten álem kýbogy kezeńderiniń birneshe dúrkin júldegeri Abzal Ájiǵalıev pen bokstan Olımpıada oıyndarynyń qola júldegeri Darıǵa Shákimova arnaıy daıyndap, qaptady.
Aktsııa Olımpıada kúniniń alǵashqy mınýttarynan bastalyp, Qazaqstannyń barlyq óńirin qamtydy. Ony júzege asyrýǵa 234 medıtsınalyq mekeme qatysýda. Olardyń qatarynda oblys ortalyqtaryndaǵy, sondaı-aq Astana, Almaty jáne Shymkent qalalaryndaǵy perzenthanalar bar.
— Biz úshin bul merekeni eń basty qundylyq — ósip kele jatqan urpaqqa degen qamqorlyqpen tolyqtyrý mańyzdy. Osy aıtýly kúni jas otbasylarǵa jylýlyq pen kóńil bólgimiz keledi. Alǵashqy sımvolıkalyq syılyqtar árbir sábı úshin jarqyn ári tabysty ómir jolynyń bastaýy bolsyn. Olarǵa zor densaýlyq pen úlken jetistikter tileımiz, — dep atap ótti Qazaqstan UOK ókilderi.
Aktsııa 23 maýsym kúni túngi saǵat 00:00–de aıaqtalady.
Aıta keteıik, Qazaqstan UOK jańa týǵan nárestelerdi alǵash ret 2020 jyly erekshe quttyqtaǵan bolatyn. Іs-shara Qazaqstan Respýblıkasy Densaýlyq saqtaý mınıstrligi men «Qazposhta» AQ qoldaýymen ótkiziledi.
Aıta ketelik astanada Memlekettik rámizder kúni dúnıege kelgen sábılerdiń ata-analaryna syılyqtar tabystalǵan edi.
