23 qyrkúıek. Týǵan kún ıeleri
ESІMDER
77 jyl buryn (1941-2004) jazýshy, aqyn-aýdarmashy SAIN Aldan dúnıege keldi.
Almaty qalasynda týǵan. Qazaq memlekettik ýnıversıtetin (qazirgi ál-Farabı atyndaǵy Qazaq ulttyq ýnıversıteti) bitirgen.
Eńbek jolyn 1958 jyly Almaty teledıdar stýdııasynan bastap, Kókshetaý oblystyq «Stepnoı maıak» gazetinde qyzmet istegen. Keıin respýblıkalyq teledıdar stýdııasynda, Qazaq KSR Televızııa jáne radıohabar jónindegi memlekettik komıtetiniń jergilikti teledıdar men radıo habaryn taratý bas redaktsııasynda, respýblıkalyq kásipodaqtar keńesiniń baspasóz ortalyǵynda, Qazaqstan Jazýshylar odaǵynyń nasıhat bıýrosynda qyzmetker, Qazaq KSR kitapqumarlar qoǵamynda jaýapty hatshy, «Qazaqtelefılm» stýdııasynda bas redaktordyń orynbasary mindetin atqarǵan. Jazýshynyń «Komıssardyń ókili» atty povesi jaryq kórgen. Jumaǵalı Saın, Maǵjan Jumabaev, t.b. aqyndardyń óleńderin orys tiline aýdarǵan.
57 jyl buryn (1961) hırýrg, medıtsına ǵylymynyń doktory, «Daryn» memlekettik syılyǵynyń laýreaty ARYN Nurlan Muhtaruly dúnıege keldi.
Almaty qalasynda týǵan. Almaty memlekettik medıtsına ınstıtýtyn bitirgen. 1984-1990 jyldary - Almaty qalalyq emhanasynyń dárigeri. 1990-1994 jyldary - Almaty memlekettik medıtsına ýnıversıtetiniń assıstenti, dotsenti. 1994-1997 jyldary - Aleksandr Syzǵanov atyndaǵy Hırýrgııa ǵylymı-zertteý ortalyǵynyń jetekshi qyzmetkeri, 1998-2003 jyldary - osy ortalyqtyń bólim meńgerýshisi. 2003-2005 jyldary - Astana qalasyndaǵy «QazMunaıGaz» Ulttyq kompanııasy» AQ-ynyń «Meıirim» kópprofıldi medıtsınalyq ortalyǵynyń bas dárigeri. Qazirgi qyzmetinde 2005 jyldan bastap «Privateclinic Almaty» kópbeıimdi medıtsınalyq ortalyǵy bas dırektorynyń emdeý isi jónindegi orynbasary bolyp isteıdi. Onyń ǵylymı jumystary soqyrishektiń irińdeýi kezindegi kallıkrınkının júıesiniń patofızıologııasyna, ultabar, ishek, ót joldarynyń bitelýine baılanysty jasalatyn operatsııalardyń erekshelikterin zertteýge arnalǵan. Ol Qazaqstanda alǵash ret balalar baýyrynyń zaqymdanǵan bólshekterin alyp tastaý (rezektsııa) jáne asqazannan jasandy (plastıkalyq) óńesh jasaý operatsııalaryn júzege asyrdy. Sonymen qatar Taldyqorǵan, Túrkistan, Pavlodar, Astana, Qaskeleń, Sarqand qalalarynda, Ońtústik Qazaqstan oblysynyń Ordabasy, Pavlodar oblysynyń Baqal, Kókterek jáne Lenın eldi mekenderi turǵyndary úshin qaıyrymdylyq aktsııalaryn uıymdastyryp, balalar men eresekterge 700-den astam operatsııa jasaǵan. Ǵalymnyń 220-dan astam ǵylymı eńbegi, onyń ishinde 6 monografııasy, 11 ádistemelik usynysy jáne Qazaqstan Respýblıkasy men KSRO-nyń 35 avtorlyq ónertabys kýáligi bar. «Qazaqstan Respýblıkasy ǵylymynyń damýyna qosqan eńbegi úshin» medalimen marapattalǵan.
42 jyl buryn (1976) QR Prezıdentiniń QR Parlamentindegi Ókildigi jetekshisiniń orynbasary QUDAIBERGENOV Eskendir Kópbosynuly dúnıege keldi.
Almaty oblysyndaǵy Qapshaǵaı qalasynda týǵan. Ál-Farabı atyndaǵy Qazaq ulttyq ýnıversıtetin bitirgen, zańger. 1997 jyldan QR Joǵarǵy sotynda qarjy-sharýashylyq bóliminiń aǵa mamany, is júrgizý jáne baqylaý bóliminiń referenti, sot alqasynyń konsýltanty, qylmystyq ister jónindegi memlekettik-quqyqtyq bóliminiń konsýltanty. 2001 jyldan - QR Prezıdenti Ákimshiliginiń memlekettik-quqyqtyq bóliminiń konsýltanty. 2003 jyldan - QR Prezıdentiniń QR Parlamentindegi ókildiginiń bas sarapshysy. 2004 jyldan - QR Joǵarǵy soty apparatynyń kadrlar jumysy basqarmasynyń bastyǵy, kadrlar jáne memlekettik qyzmet bóliminiń meńgerýshisi. 2005 jyldan - Aqtóbe oblysy mamandandyrylǵan aýdanaralyq ekonomıkalyq sotynyń tóraǵasy. 2006 jylǵy qarashadan - QR Tabıǵı monopolııalardy retteý agenttigi tóraǵasynyń orynbasary. Qazirgi qyzmetinde 2011 jyldan beri.