23 qazan. Kazinform kúntizbesi. Tulǵalar týǵan kún

Qanysh MOLDABAEV, «Samuryq-Energo» AQ Dırektorlar keńesiniń múshesi

1963 jyly Pavlodar oblysynda dúnıege kelgen. 1987 jyly Pavlodar ındýstrııalyq ınstıtýtyn ınjener-elektrık, 2002 jyly Qaraǵandy memlekettik tehnıkalyq ýnıversıtetin ekonomıst-zańger mamandyqtary boıynsha bitirgen. 2004 jyly Qazaqstan Respýblıkasy Prezıdentiniń janyndaǵy Memlekettik basqarý akademııasynda memlekettik qyzmet menedjeri biliktiligin alǵan. 2020 jyly Reseı Federatsııasy Prezıdentiniń janyndaǵy Reseı halyq sharýashylyǵy jáne memlekettik qyzmet akademııasynda iskerlik ákimshilendirý doktory dárejesin ıelengen.

Eńbek joly: 1987 jyly Baıanaýyl aýdandyq elektr jelilerinde elektr slesary, keıin sheber bolyp jumys istegen. 1988-1989 jyldary dıspetcher, 1989-1996 jyldary bas ınjener, 1996-1997 jyldary aýdandyq elektr jelileriniń bastyǵy qyzmetterin atqarǵan. 1997-1999 jyldary Baıanaýyl aýdandyq elektr jelileri aktsıonerlik qoǵamynyń prezıdenti bolǵan. 1999-2004 jyldary Pavlodar oblysy Baıanaýyl aýdany ákiminiń orynbasary, 2004-2007 jyldary Energetıka jáne mıneraldyq resýrstar mınıstrliginiń Elektr energetıkasy basqarmasynyń bastyǵy qyzmetine taǵaıyndalǵan. 2007-2009 jyldary KEGOC AQ «Soltústik MEJ» fılıalynyń dırektory, 2009-2011 jyldary KEGOC AQ Ulttyq elektr jelisin damytý departamentiniń dırektory, 2011-2012 jyldary «Samuryq-Qazyna» AQ Indýstrııalyq aktıvterdi basqarý jónindegi dırektory boldy. 2012 jyly «Samuryq-Energo» AQ Innovatsııalyq-tehnologııalyq saıasat jáne damý departamentin basqardy. 2012-2014 jyldary «Samuryq-Energo» AQ Damý jónindegi basqarýshy dırektory, 2014-2015 jyldary Basqarma tóraǵasynyń orynbasary, 2015-2016 jyldary Basqarma tóraǵasynyń birinshi orynbasary qyzmetterin atqarǵan. 2016-2018 jyldary «Samuryq-Energo» AQ basqarýshy dırektory — Basqarma múshesi, 2018-2019 jyldary «KAES» AQ bas dırektorynyń orynbasary, 2019-2021 jyldary «Samuryq-Qazyna» AQ-nyń «Energetıka» sektorynyń jetekshisi boldy. 2021 jyly «Samuryq-Qazyna» AQ Energetıkalyq jáne taý-ken aktıvteri dırektsııasynyń dırektory, 2021-2023 jyldary «KEGOC» AQ Basqarma tóraǵasy qyzmetterin atqarǵan.

Qazirgi qyzmetin 2023 jylǵy shildeden bastap atqaryp keledi.

«Qurmet» (2015) jáne «Parasat» (2021) ordenderimen, «Qazaqstan Respýblıkasynyń táýelsizdigine 10 jyl» (2001), «Qazaqstan Respýblıkasynyń táýelsizdigine 20 jyl» (2011) jáne «KazEnergy» (2010) medaldarymen marapattalǵan. Sondaı-aq «TMD-nyń eńbek sińirgen energetıgi» (2010), «QEQ-tyń eńbek sińirgen energetıgi» (2012) jáne «Qazaqstan Respýblıkasynyń eńbek sińirgen energetıgi» (2021) qurmetti ataqtaryna ıe.

Erjan QARYMSAQOV, QR Memlekettik qyzmet isteri agenttigi Túrkistan oblysy boıynsha departamentiniń basshysy

1980 jyly Qyzylorda qalasynda dúnıege kelgen. 2001 jyly Qazaq memlekettik zań akademııasyn zańger mamandyǵy boıynsha, 2014 jyly Qorqyt ata atyndaǵy Qyzylorda memlekettik ýnıversıtetin ekonomıka jáne bıznes bakalavry dárejesi boıynsha bitirgen.

Eńbek joly: 2001-2005 jyldary QR Bas prokýratýrasynyń Qyzylorda oblysy boıynsha Quqyqtyq statıstıka jáne arnaıy esepke alý komıtetinde túrli qyzmetter atqarǵan. 2005-2013 jyldary QR Memlekettik qyzmet isteri agenttiginiń Qyzylorda oblysy boıynsha basqarmasynda konsýltant, bólim basshysy bolǵan. 2014-2016 jyldary QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Memlekettik qyzmet jáne sybaılas jemqorlyqtyń aldyn alý departamenti basqarmasynyń bas konsýltanty qyzmetin atqarǵan. 2016-2019 jyldary QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń orynbasary, 2019 jylǵy tamyz-qazan aılarynda QR Memlekettik qyzmet isteri agenttiginiń Qyzylorda oblysy boıynsha departamenti basshysynyń orynbasary qyzmetin atqarǵan.

2020 jyly QR Memlekettik qyzmet isteri agenttiginiń basqarma basshysy bolǵan. 2020-2024 jyldary agenttiktiń Pavlodar oblysy boıynsha departamentiniń basshysy ári Ádep jónindegi keńes tóraǵasy, 2024-2026 jyldary Soltústik Qazaqstan oblysy boıynsha departamentiniń basshysy ári Ádep jónindegi keńes tóraǵasy qyzmetterin atqarǵan.

Qazirgi qyzmetin 2026 jylǵy sáýir aıynan bastap atqaryp keledi.

Erkebulan ІLIıASOV, «Alageum Electric» kompanııasynyń Dırektorlar keńesiniń tóraǵasy, Qazaqstan Respýblıkasy Ulttyq sport qaýymdastyǵynyń prezıdenti

1985 jyly Túrkistan oblysynda dúnıege kelgen. 2008 jyly Almaty energetıka jáne baılanys ınstıtýtyn elektr energetıkasy mamandyǵy boıynsha bitirgen.

Eńbek joly: «Almaty elektromehanıkalyq zaýyty» JShS men «Kentaý transformator zaýyty» AQ-da transformatorlar men qosalqy stantsııalardy qurastyrýshy, montajshy, óndiris dıspetcheri bolyp jumys istegen. 2008 jyly «Kentaý transformator zaýyty» AQ Bas konstrýktor bóliminiń ınjener-konstrýktory, 2009-2010 jyldary «35-110 kV kúshtik transformatorlar óndirisi» jobasynyń jetekshisi bolǵan. 2010-2016 jyldary «Alageum Electric» AQ basqarýshy kompanııasy bas dırektorynyń orynbasary qyzmetin atqarǵan. 2016 jyldan bastap «Alageum Group» JShS bas dırektory ári Dırektorlar keńesiniń tóraǵasy, 2024 jyldan bastap «Alageum Electric» JShS Dırektorlar keńesiniń tóraǵasy. 2023 jylǵy qańtardan bastap «Jamby atý» federatsııasynyń, 2024 jylǵy qańtardan bastap arqan tartý federatsııasynyń prezıdenti.

Eset BAIKEN, Ulytaý oblysynyń ákimi

1986 jyly Qaraǵandy oblysynda dúnıege kelgen. 2008 jyly Qazaq gýmanıtarlyq-zań ýnıversıtetin quqyqtaný bakalavry dárejesi boıynsha, 2010 jyly akademık E.A.Bóketov atyndaǵy Qaraǵandy memlekettik ýnıversıtetin ekonomıka bakalavry mamandyǵy boıynsha bitirgen.

Eńbek joly: 2008-2010 jyldary Astana qalasynyń Ekonomıka jáne bıýdjettik josparlaý basqarmasynda jetekshi, bas maman, 2010-2013 jyldary Astana qalasy ákiminiń apparatynda áleýmettik-mádenı sala bóliminiń bas mamany boldy. 2013-2016 jyldary Astana qalasy ákimdiginiń bas ınspektory, uıymdastyrý-ınspektorlyq bóliminiń basshysy qyzmetterin atqarǵan. 2016-2017 jyldary QR Prezıdenti Ákimshiligi basshysynyń hatshylyǵynda sarapshy, 2017-2019 jyldary Memlekettik baqylaý jáne uıymdastyrý-aýmaqtyq jumys bóliminde memlekettik ınspektor bolǵan. 2019 jyly Qaraǵandy oblysy Nura aýdanynyń ákimi, 2019-2020 jyldary Astana qalasy ákiminiń apparat basshysy, 2019-2022 jyldary Astananyń «Saryarqa» aýdanynyń ákimi qyzmetterin atqarǵan. 2022-2026 jyldary Astana qalasy ákiminiń orynbasary bolǵan.

Qazirgi qyzmetin 2026 jylǵy shildeden bastap atqaryp keledi.

Shavkat RAHMONOV, aralas jekpe-jek sheberi

1994 jyly Ózbekstanda dúnıege kelgen. 2014 jyly Qazaqstan azamattyǵyn alǵan.

Sporttaǵy jetistikteri: 2013 jyly WMMAA nusqasy boıynsha áýesqoı MMA-dan álem chempıony atandy. 2014 jyly MMA-dan Azııa chempıony bolyp, álem chempıonatynda kúmis júlde ıelendi. 2015 jyly WMMA álem chempıonatynda ekinshi oryn aldy. 2018 jyly Battle of Nomads 11 týrnırinde chempıondyq belbeýin qorǵady. 2019 jyly M-1 Challenge 101 týrnırinde jartylaı orta salmaqta chempıon atandy. 2022 jyly UFC Fight Night týrnırinde Karlston Harrısti birinshi raýndta nokaýtpen jeńip, «Keshtiń úzdik óneri» bonýsyn aldy. Sol jyly Nıl Magnıdi ekinshi raýndta jeńdi.

Mánshúk MÁMETOVA, Keńes Odaǵynyń Batyry, 3-ekpindi armııanyń Kalının maıdany quramyndaǵy 100-jeke atqyshtar brıgadasynyń pýlemetshisi, gvardııanyń aǵa serjanty. Keńes Odaǵynyń Batyry ataǵyn alǵan tuńǵysh qazaq qyzy

1922 jyly Qazaqstannyń Oral oblysy Orda aýdanyna qarasty Jasqus aýylynda dúnıege kelgen. Otbasynda besinshi bala bolǵan. Ata-anasynan erte aıyrylyp, Almatyda tátesiniń qolynda tárbıelengen. Orta mektepti bitirgen soń jumysshy fakýltetinde bilim alyp, Qazaq KSR Halyq Komıssarlary Keńesiniń hatshylyǵynda jumys istegen. 1942 jyly Almaty medıtsınalyq ınstıtýtynyń eki kýrsyn aıaqtap, óz erkimen maıdanǵa attanǵan.

1942 jyldyń tamyzynan Qyzyl Armııa qatarynda qyzmet etti. Alǵashynda shtabta hatshy, keıin dalalyq gospıtalda medbıke boldy. Bos ýaqytynda «Maksım» pýlemetiniń qurylysyn meńgerip, atqyshtar bólimine aýysýǵa qol jetkizdi. Nysana kózdeýdi ınstıtýtta oqyp júrgen kezinen-aq jaqsy meńgergen edi.

1943 jylǵy 15 qazanda Kalının maıdanynyń áskerleri Pskov oblysyndaǵy Nevel qalasyn azat etý úshin shaıqasty. Sol urysta qarýlastary qaza tapqan soń, Mánshúk pýlemetten oq jaýdyryp, jaýdyń 70 jaýyngerin joıyp, erlikpen qaza tapty. Nevel qalasynda jerlengen.

1944 jylǵy 1 naýryzda KSRO Joǵarǵy Keńesi Prezıdıýmynyń Jarlyǵymen Mánshúk Jıenǵalıqyzy Mámetovaǵa Keńes Odaǵynyń Batyry ataǵy qaıtys bolǵannan keıin berildi.