23 qarashaǵa arnalǵan aýa raıy boljamy
ASTANA. 22 qarasha. QazAqparat - Qazaqstan Respýblıkasynda kólemdi antıtsıklon yqpalymen aýa raıy jaýyn-shashynsyz bolady dep kútilýde, keı jerlerde tuman saqtalady jáne jel kúsheıedi, dep habarlaıdy QR TJM baspasóz qyzmetinen "Qazgıdromet" RMK-ǵa silteme jasap.
Ońtústik Qazaqstan oblysynda, túnde Mańǵystaý, kúndiz Qyzylorda, Batys Qazaqstan oblystarynda keı jerlerde jel 15-20 m/s-ke kúsheıedi dep boljanýda.
Jambyl oblysynyń birqatar aýmaqtarynda tuman túsedi, jel 15-20 m/s-ke kúsheıedi. Almaty, Shyǵys Qazaqstan oblystarynda, túnde jáne tańerteń Qostanaı, Qaraǵandy oblystarynda keı jerlerde tuman túsedi dep kútilýde.
Aldaǵy úsh táýlikte Qyzylorda oblysynyń aýmaǵynda Syrdarııa ózeninde ózen arnalaryn retteýge baılanysty sý kóleminiń ulǵaıýy baıqalady. Batys Altaıdyń (ShQO) kóptegen ózenderinde sý deńgeıiniń tómendeýi jalǵasady. Qazaqstannyń kóptegen ózenderinde sý beti birte-birte salqyndaıdy.
