23 halyqaralyq júlde men «Taýrýs» syılyǵy: Otandyq kınematografııa jyldy qalaı qorytyndylady
««Qazaqfılm» festıval kınohıtteri osy jyly 12-16 aqpanda Almaty qalasyndaǵy «Arman» kınoteatrymen jáne Qazaqstan kınosynshylary qaýymdastyǵymen birlesip, halyqaralyq kınofestıvalderdiń júldegerleri atanǵan «Shyńyraý», «Qyz ben teńiz», «Tulǵalyq ósý trenıngi», «Ózen» kınokartınasy kórsetildi. Osy jyly «Qazaqfılm» kınostýdııasynyń 25 kınotýyndysy 51 halyqaralyq kınofestıvalge qatysyp, 23 júldeli orynǵa ıe boldy», - dep jaýap berdi Mádenıet jáne sport mınıstrliginiń baspasóz qyzmeti QazAqparat agenttiginiń resmı saýalyna.
Mınıstrlik keltirgen málimetke sáıkes, Qazaqstan kınematografısteri jáne Qazaqfılm kınotýyndylary «Synshylar tańdaýy 2020» jyldyq qazaqstandyq kınopremııaǵa usynylyp 5 nomınatsııa boıynsha júldeli oryndarǵa qol jetkizgen. Sonymen qatar «Kompozıtor» kórkem fılmi Kanadada ótetin halyqaralyq kınofestıvalde 4 júldeli oryndy («Úzdik kartına», «Úzdik rejıssýra», «Úzdik áıel róli» Arýjan Jazylbekova, «Úzdik er adam róli», Berik Aıtjanov) ıelengen.
Bıyl sonymen birge Farhat Sháripovtyń «18 kılogerts» kartınasy Varshava halyqaralyq kınofestıvaliniń Gran-prı syılyǵyna ıe boldy. Rejısser Ernar Nurǵalıev túsirgen «Janym, ty ne poverısh!» komedııasy Reseıdiń «Kınoshok» festıvaliniń bas júldesin qanjyǵasyna baılady. Taǵy bul kartına Býenos-Aırestegi eń kóne janrlyq kıno festıvalge qatysady.
Qazaqstan men Ońtústik Koreıa kınematografısteri birlese túsirilgen Rýslan Paktyń «Trı» fılmi Azııadaǵy eń iri Pýsan kınofestıvalinde júldeli boldy.
«Tamyz aıynda Lokarnodaǵy halyqaralyq kınofestıvalde qazaqstandyq rejısser Janat Alshanovanyń «Istorııa tsıvılızatsıı» fılmi «Kúmis qabylan» syılyǵyn ıelendi. Budan basqa «Qyz ben teńiz» jáne «Shyńyraý» fılmi Sofııadaǵy halyqaralyq kınofestıval baǵdarlamasyna qatysady. «Qyz ben teńiz» kartınasy Bangladeshtegi halyqaralyq kınofestıvaldiń negizgi konkýrsyna ótken. Al rejısser Elena Lısasınanyń «Batyr» fılmi London kınofestıvalinde marapatqa ıe boldy. Osy oraıda, Ádilhan Erjanovtyń jumysyn jeke atap ótýge bolady. Bıyl rejısserdiń «Jeltaıa koshka» fılmi bedeldi Venetsııa kınofestıvaliniń «Kókjıekter» baǵdarlamasyna qatysyp, «Máskeýlik tusaýkeser» halyqaralyq kınofestıvalinde júldege ıe boldy. Sol kınofestıvalge qatysqan taǵy bir rejısser Ramazan Halıollanyń «Dombyra» fılmi ádil qazylar alqasynyń arnaıy syılyǵymen marapattalǵan», - delingen jaýapta.
Osy jyldyń eń úlken oqıǵasy – NomadStunts kaskaderlik komandasynyń negizin qalaýshy ári jetekshisi Jaıdarbek Kúnǵojınovqa álemdik kaskaderler akademııasynyń «Taýrýs» syılyǵynyń tabystalýy. Bul syılyq fılmdegi úzdik trıýkter úshin beriledi. Osy jyly ádil qazylar bizdiń kaskaderlerdiń «Tomırıs» fılmindegi eńbegine joǵary baǵa berdi.
«Jańa túsirilgen kınojobalardyń shyǵý merzimin karantınge baılanysty josparlanǵan ýaqyttan keıinge shegerýge májbúr boldyq», - deıdi mınıstrlikten.
