23 el jáne 400-den astam kompanııa: Automechanika Astana kórmesinen ne kórýge bolady
ASTANA. KAZINFORM – EXPO halyqaralyq kórme ortalyǵynda Ortalyq Azııadaǵy avtomobıl ındýstrııasyna arnalǵan eń iri halyqaralyq kórme – Automechanika Astana 2026 ótip jatyr. Bul týraly Týrızm jáne sport mınıstrliginiń baspasóz qyzmeti habarlady.
Bıyl onynshy ret uıymdastyrylyp otyrǵan mereıtoılyq kórmege álemniń 23 elinen 400-den astam kompanııa qatysýda. Olardyń qatarynda Qazaqstan, Germanııa, Qytaı, Birikken Arab Ámirlikteri, Ońtústik Koreıa, Úndistan, Reseı jáne basqa da memleketter bar. Kórme aıasynda Qytaı, Ózbekstan jáne Irannyń ulttyq pavılondary usynylǵan.
Ótkizilgen jyldar ishinde Automechanika Astana avtomobıl salasyndaǵy kásibı dıalogty damytýǵa, tájirıbe almasýǵa, ozyq tehnologııalardy tanystyrýǵa jáne iskerlik baılanysty nyǵaıtýǵa arnalǵan jetekshi halyqaralyq alań retinde tanyldy.
Kórmeniń ashylý rásimine memlekettik organdardyń, halyqaralyq uıymdardyń jáne bıznes qaýymdastyqtyń ókilderi qatysty. Qazaqstan Respýblıkasy Týrızm jáne sport mınıstrligi atynan quttyqtaý sóz sóılegen Týrızm jáne sport vıtse-mınıstri Serik Jarasbaev kórmeniń salany damytýdaǵy mańyzyna toqtaldy.
«Kórme – salanyń damý deńgeıin aıqyndaıtyn mańyzdy kórsetkish. Qazaqstanǵa sheteldik seriktesterdiń qyzyǵýshylyǵy artyp kele jatqanyn kórip otyrmyz jáne avtomobıl sektoryn odan ári damytýǵa qoldaý kórsetýge daıynbyz», – dedi Serik Jarasbaev.
Kórmede avtokólik bólshekteri, maılaý materıaldary, avtohımııa ónimderi, tehnıkalyq qyzmet kórsetý stantsııalaryna arnalǵan jabdyqtar, shınalar, akkýmýlıatorlar, dıagnostıkalyq júıeler jáne avtomobıl salasyna arnalǵan tsıfrlyq sheshimder tanystyrylýda.
Іskerlik baǵdarlama aıasynda Automechanika Academy taqyryptyq sessııalary, B2B formatyndaǵy kezdesýler, salalyq pikirtalastar jáne naryqtyń jetekshi sarapshylarynyń baıandamalary ótedi.
Automechanika Astana 2026 kórmesi 12 maýsymǵa deıin Astana qalasyndaǵy EXPO halyqaralyq kórme ortalyǵynda óz jumysyn jalǵastyrady.
Buǵan deıin Astanada Automechanika Astana 2026 halyqaralyq kórmesi ótetinin habarlaǵanbyz.
