227 jolaýshysy bolǵan Boeing ushaǵyn izdeý jumystary jalǵasady
ASTANA. QazAqparat - Avstralııalyq kóliktegi qaýipsizdik bıýrosy (ATSB) 30 qyrkúıekte bıylǵy jyldyń naýryz aıynyń basynda joǵalyp ketken malaızııalyq Boeing ushaǵyn izdestirý jumystaryn qaıta qolǵa almaq. Bul týraly brıtandyq Independent basylymy habarlaıdy, dep jazady ITAR TASS.
Jerserik málimetterin taldaý izdeý jumystary kóbirek júrgizilýi tıis aımaqtardy naqty anyqtap berdi. Sońǵy esepteýler kórsetkendeı, MH370 ushaǵy óz baǵytyn osyǵan deıingi boljamnan burynyraq ózgertken. Osylaısha, ol teńizge qulamastan, ári qaraı ońtústikti bet alyp ketken bolýy múmkin.
Basylymnyń jazýynsha, táýelsiz halyqaralyq sarapshylar toby ushaq apatynyń Avstralııanyń Pert qalasynan ońtústik-batysqa qaraı 2,5 myń shaqyrym jer aımaǵynda oryn alýy múmkin ekenin aıtady. Sondaı-aq olar áýe kemesiniń qalypty jyldamdyqpen qalypty bıiktikte ushqanyn, ıaǵnı bul turǵyda esh aýytqý bolmaǵanyn boljap otyr.
Esterińizge sala keteıik, malaızııalyq kompanııaǵa tıesili laıner «Kýala-Lýmpýr-Beıjiń» baǵyty boıynsha reıske bıylǵy jylǵy 7 naýryz kúni shyqqan. Onyń bortynda 227 jolaýshy men 12 ekıpaj múshesi bolǵan. Ushaqpen baılanys ol Malaızııa astanasynan ushyp shyqqannan keıin eki saǵat ótken soń úzilgen.
