227 myńnan astam atyraýlyq sportpen turaqty shuǵyldanady
Atyraý oblystyq dene shynyqtyrý, sport jáne týrızm basqarmasynyń basshysy Dastanbek Qospanovtyń aıtýynsha, bul kórsetkish ótken jylmen salystyrǵanda 1,3%-ǵa ósken.
«Oblysta 2025 jylǵa deıin buqaralyq sportpen turaqty túrde aınalysýshylar sanyn 50%-ǵa arttyrý josparlanyp otyr. Qazir kásibı maqsatta ashylǵan 9 sport klýby jumys isteıdi. Ulttyq sport, basketbol, voleıbol, sý sporty klýbtary jekeshelendirildi. Al hokkeı men fýtbol, boks klýbtary senimgerlikpen basqarýǵa berildi», - dep habarlady Dastanbek Qospanov.
Onyń málimetinshe, sporttyq klýbtarda jattyǵýshylar sany 4 276-ǵa jetken.
«Jyl basynan beri buqaralyq sportty damytý maqsatynda 800-den asa sporttyq is-shara uıymdastyryldy. Oǵan 150 myńnan astam adam qatysty. Onyń ishinde 560 is-shara aýyldarda ótip, 110 myńnan astam turǵyndy qamtydy. Oblysta 1000 adamǵa shaqqanda turǵyndardy sport ınfraqurylymymen qamtý deńgeıi 38,2% bolyp otyr.
2027 jylǵa deıin 26 sport kesheni salynyp, bul kórsetkishti 40%-dan asyrý josparlanyp otyr», - dedi Dastanbek Qospanov.
Atyraý oblysynda 1 217 sport nysany bar. Bıyl Isataı aýdanynyń Tuşyqudyq aýylynda sport kesheni paıdalanýǵa berilgen.
«Qazir 8 sport nysanynyń qurylysy salynyp jatyr. Al 4 nysandy qaıta jańǵyrtý qolǵa alyndy. Taǵy eki sport nysanyn salý josparlanyp otyr. Onyń biri – daryndy balalarǵa arnalǵan sport mektep-ınternaty. Ekinshisi – Jańatalap aýylyndaǵy sport kesheniniń qurylysy», - dep málim etti basqarma basshysy.
Eske sala ketelik, buǵan deıin Aıbolat Ystybaı Horvatııadaǵy Gran-prı týrnıriniń qola júldegeri atanǵanyn jazǵan edik.
