225 mln teńge jymqyrdy degen kúdikpen «Temirjolsý-Mańǵystaý» burynǵy bas býhgalteri ustaldy

ASTANA. QazAqparat - Asa iri mólsherde senip tapsyrylǵan múlikti zańsyz ıemdendi nemese jymqyrdy degen kúdikpen «Temirjolsý-Mańǵystaý» JShS burynǵy bas esepshisi ustaldy, dep habarlaıdy QazAqparat.

QMA Mańǵystaý oblysy boıynsha departamenti mekemeniń burynǵy bas esepshisi kvazımemlekettik sektor qyzmetkeri bola tura, 2021 jylǵy jeltoqsan men 2023 jylǵy mamyr aralyǵynda salyq tóleý jeleýimen tólem qujattaryna jalǵan aqparat engizý arqyly jeke tulǵalardyń esepshotyna seriktestik qarajatyn aýdaryp, keıinnen ózine qaıtaryp alǵanyn anyqtady.

Mekemeden zańsyz ıemdenip alǵan qarajatty ol jeke qajettiligine jumsaǵan.

Bas esepshiniń qylmystyq áreketteriniń saldarynan seriktestikke asa iri mólsherde 225 mln teńgeden astam somaǵa materıaldyq shyǵyn kelgen.

Tergeý jalǵasyp jatyr. QR QPK 201-babynyń talaptaryna sáıkes tergeý múddesinde ózge aqparat jarııalanbaıdy.