225 qazaqstandyq «Bolashaq» halyqaralyq stıpendııasynyń ıegeri atandy
ASTANA. KAZINFORM — «Bolashaq» halyqaralyq stıpendııasy jáne «Ǵylymı taǵylymdamalar» baǵdarlamasy ıegerleriniń tizimi jarııalandy.
Shetelde kadrlar daıarlaý jónindegi respýblıkalyq komıssııanyń sheshimimen bıyl 225 qazaqstandyq «Bolashaq» halyqaralyq stıpendııasynyń ıegeri atandy. Olardyń ishinde 152 adam magıstratýrada bilim alýǵa, 16 úmitker doktorantýra baǵdarlamalaryna joldama aldy. Al 57 qazaqstandyq álemniń jetekshi ýnıversıtetteri men ǵylymı-bilim berý ortalyqtarynda kásibı taǵylymdamadan ótedi.
Baǵdarlamanyń salalyq qurylymy da memlekettiń strategııalyq basymdyqtaryn aıqyn kórsetip otyr. Máselen, stıpendıattardyń 69,8%-y jaratylystaný-tehnıkalyq baǵyttar boıynsha, al 30,2%-y qoǵamdyq-gýmanıtarlyq beıin boıynsha oqıdy.
Sonymen qatar, taǵy 182 qazaqstandyqqa álemniń jetekshi ǵylymı jáne zertteý ortalyqtarynda ǵylymı taǵylymdamadan ótýge stıpendııa taǵaıyndaldy. Ǵylymı taǵylymdamalar — otandyq ǵylym men óndiristiń damýyna serpin beretin, zamanaýı bilim men ozyq tájirıbeni elge transfertteýdiń mańyzdy tetigi.
Memleket basshysy aıqyndaǵan Qazaqstandy aldaǵy úsh jyl ishinde tsıfrlyq memleketke aınaldyrý baǵytyn iske asyrý maqsatynda naqty sektorda praktıkalyq qoldanýǵa baǵdarlanǵan jasandy ıntellekt salasyndaǵy mamandardy daıarlaý kúsheıtiledi. Osyǵan oraı, 2026 jyly kásibı taǵylymdamalarǵa qatysýshylar úshin «Jasandy ıntellekt júıesin paıdalanýshylar» atty jańa sanat bekitildi.
Sondaı-aq komıssııa otyrysynda 2026 jyldan bastap magıstratýra, doktorantýra, taǵylymdama boıynsha atom energetıkasy salasyndaǵy mamandardy daıarlaýǵa baǵyttalǵan arnaıy sanatty engizý týraly sheshim qabyldandy.
«Bolashaq» halyqaralyq stıpendııasy ıegerleriniń tizimi men ǵylymı taǵylymdama taǵaıyndalǵan úmitkerler tizimi.
Aıta ketelik 2026 jyly «Bolashaq» stıpendııasyn taǵaıyndaý tártibine ózgeris engiziletini týraly jazǵan edik.