224,7 mlrd teńge bıýdjet qarajatyn negizsiz paıdalanýǵa jol berilmedi — Antıkor
ASTANA. KAZINFORM — Agenttiktiń bastamasy boıynsha kvazımemlekettik sektor sýbektileriniń satyp alýdy júzege asyrý tártibin buzǵany úshin ákimshilik jaýaptylyqty kózdeıtin baptyń vedomstvolyq baǵynystylyǵy aıqyndaldy. Bul týraly Antıkordyń baspasóz qyzmeti habarlady.
Agenttik memlekettik satyp alý salasynda sybaılas jemqorlyqqa qarsy is-qımyl boıynsha keshendi jumys istelip jatyr.
Sybaılas jemqorlyq quqyq buzýǵa jasaýǵa yqpal etetin sebepter men jaǵdaılardy boldyrmaý maqsatynda aldyn alý sharalaryna erekshe nazar aýdarylady.
Mańyzdy baǵyttardyń biri satyp alynatyn taýarlardyń, jumystar men kórsetiletin qyzmetterdiń josparly baǵalaryn kóterý turǵysynan memlekettik satyp alýlardyń sybaılas jemqorlyqqa qarsy monıtorıngi.
— Bıyl 5 aıda 29 mlrd teńgege osyndaı faktiler anyqtaldy, onyń 6,4 mlrd teńgesi bıýdjetke qaıtaryldy. Qalǵan somany (22,6 mlrd teńge) tapsyrys berýshiler qaıta qarap, olar boıynsha josparly baǵalar tómendedi nemese satyp alynatyn taýarlar kólemi ulǵaıdy (2024 jyly 55 mlrd teńgege artyq ósim anyqtaldy, onyń ishinde 26 mlrd teńgesi bıýdjetke qaıtaryldy, 29 mlrd teńgege satyp alý qaıta qaraldy), — delingen Antıkor habarlamasynda.
Jalpy, jobany iske asyrý bastalǵannan beri (2019 j.) 224,7 mlrd teńge bıýdjet qarajatyn negizsiz paıdalanýǵa jol berilmedi.
Aldyn alý áserin kúsheıtý barysynda osy saladaǵy zań buzý úshin ákimshilik jaýapkershilikke tartý boıynsha jumys jandandyryldy (Antıkormen monıtorıng barysynda anyqtalǵan buzýshylyq belgileri bar barlyq faktiler ishki memlekettik aýdıt organdaryna ákimshilik hattama jasaý úshin beriledi).
— Oń tájirıbe jınaqtaldy. Eger 2024 jyly agenttik departamentteri nebári 22 zań buzý anyqtaǵan bolsa, onda aǵymdaǵy jyldyń ótken kezeńinde 95 zań buzý anyqtaldy. Sonymen qatar zańnamany jetildirý boıynsha júıeli jumys istelip jatyr. Agenttiktiń birqatar usynymdy «Memlekettik satyp alý týraly» jańa zańda iske asyryldy (01.01.2025 j. bastap kúshine endi). «QBP» formatynda qaǵaz túrinde satyp alý alynyp tastaldy (quqyqtyq tártip pen Ulttyq qaýipsizdik qajettilikterin qospaǵanda), zııatkerlik menshik obektilerin satyp alý boıynsha shekteýler engizildi (olardy satyp alýǵa monopolııaǵa qarsy organnyń osyndaı taýarlar men qyzmetterdi óndirýshilerdiń joqtyǵy týraly qorytyndysy bolǵan kezde ǵana jol beriledi), sybaılas jemqorlyq úshin sottalǵan adamdardyń satyp alýǵa qatysýǵa tyıym salý belgilendi, — delingen habarlamada.
Agenttiktiń bastamasy boıynsha kvazımemlekettik sektor sýbektileriniń satyp alýdy júzege asyrý tártibin buzǵany úshin ákimshilik jaýaptylyqty kózdeıtin baptyń vedomstvolyq baǵynystylyǵy aıqyndaldy (buǵan deıin ÁQBtK-niń 207-1-baby boıynsha organ aıqyndalmaǵan bolatyn, osyǵan baılanysty norma jumys istemegen, qazir ýákiletti organ retinde Qarjy mınıstrligin aıqyndaǵan).
Memlekettik satyp alý salasyn jetildirý jumystary jalǵasyp jatyr. Júrgizilgen taldaýlar sheńberinde, onyń ishinde azamattardyń ótinishteri boıynsha osy baǵyttaǵy aldyn alý sharalary boıynsha jańa usynystar ázirlenip jatyr.
Olardy kezeń-kezeńimen iske asyrý maqsatynda aǵymdaǵy jyldyń 6 naýryzynda Qarjy mınıstrligimen 2025 jylǵa arnalǵan memlekettik satyp alý salasyndaǵy sybaılas jemqorlyq táýekelderin joıý jónindegi birlesken Jol kartasy bekitildi.
Aıta ketelik Antıkor qurylysy uzaqqa sozylǵan jobalardy baqylaýǵa alǵany týraly jazǵan edik.