223 mln teńgeden astam jalaqy qaryzy óndirildi - Qyzylorda oblysy

 QYZYLORDA. QazAqparat - Bıylǵy jyldyń 6 aıynda oblystyq eńbek salasyn baqylaý basqarmasy 61 mekemeden 1783 jumysshyǵa 223,2 mln teńge jalaqy qaryzyn óndirip berdi. 

Bul týraly basqarma basshysy Ertileý Jalǵasbaev Óńirlik kommýnıkatsııalar qyzmetinde ótken baspasóz máslıhatynda aıtty, dep habarlady QazAqparat.

  Jyl basynan beri eńbek ınspektsııasy ár túrli menshiktegi 179 mekeme men kásiporyndy teksergen. Onyń nátıjesinde 238 zań buzýshylyq faktileri áshkerelendi. Sonymen qatar, Qyzylorda oblysynyń memlekettik kirister departamenti bankrottyq jáne ońaltý rásimi júrgizip jatqan 4 kásiporynnyń 85 jumysshyǵa 12,2 mln teńge jalaqy qaryzy bar ekendigi anyqtaldy.

 Sondaı-aq, óndiristik jaraqattaný derekteri de tirkelgen. Osy jylǵy jarty jylda 27 jazataıym oqıǵa bolǵan, onyń 16-sy eńbek qyzmetinen dep tanylǵan, odan 18-i zardap shegip, 11 adam aýyr jaraqat alǵan.