$222 mlrd — Norvegııanyń zeınetaqy qoryna rekordtyq túsim tústi

ASTANA. KAZINFORM — Aktıvi 1,8 trln dollarǵa teń álemdegi eń iri táýelsiz qor sanalatyn Norvegııanyń memlekettik zeınetaqy qoryna ótken jyly $222 mlrd kiris kirgen. Bul — rekordtyq kórsetkish. 

— Qor 2024 jyly óte joǵary kiriske qol jetkizdi, bul erekshe kúshti qor naryǵynyń arqasynda múmkin boldy. Ásirese AQSh-tyń tehnologııalyq kompanııalarynyń aktsııalary jaqsy nátıje kórsetti, — dep atap ótti Norvegııanyń ortalyq bankiniń bólimshesi NBIM bas dırektory Nıkolaı Tangen.

Esepke sáıkes, tehnologııalyq sektor aktsııalar boıynsha eń joǵary kiristilikti qamtamasyz etip, 1,17 trln norvegııalyq kron paıda ákeldi. Eń tabysty ınvestıtsııalar NVIDIA, Apple, Amazon, Alphabet jáne Microsoft aktsııalaryna salynǵan qarjy boldy. Alaıda, Tangen mundaı qolaıly naryqtyq jaǵdaılar «únemi bola bermeıdi» dep eskertti.

Memlekettik zeınetaqy qorynyń (GPFG) málimetteri boıynsha qordyń aktsııalarǵa salǵan ınvestıtsııalarynyń kiristiligi 18%-dy qurady. Al turaqty tabysy bar baǵaly qaǵazdar 1% paıda ákelip, bırjada satylmaıtyn (jekemenshik) jyljymaıtyn múlik ınvestıtsııalary 1% shyǵynǵa ushyrady. Sonymen qatar, jańartylatyn energııa kózderiniń bırjadan tys ınfraqurylymyna ınvestıtsııalar 10% shyǵyn ákeldi. Jalpy, qordyń kiristiligi onyń negizgi ındeksinen 45 bazıstik pýnktke tómen boldy.

Qor aktıvteriniń 71,4% — aktsııalarǵa; 26,6% — turaqty tabysy bar baǵaly qaǵazdarǵa; 1,8% — bırjadan tys jyljymaıtyn múlikke; 0,1% — jańartylatyn energııa kózderiniń ınfraqurylymyna salynǵan.

Norvegııanyń Memlekettik zeınetaqy qory eki táýelsiz qordan quralǵan:

— Memlekettik zeınetaqy qory — «Jahandyq»;
— Norvegııanyń Úkimettik zeınetaqy qory.

Birinshi qor álemdegi bırjada tirkelgen barlyq kompanııalardyń shamamen 1,5% aktsııasyna ıe, onyń ishinde Apple, Microsoft jáne Samsung kompanııalary da bar.

Materıaldyń aǵylshyn tilindegi túpnusqa mátinimen osy silteme arqyly tanysýǵa bolady. 

Buǵan deıin Norvegııa taq murageriniń uly qylmys jasady dep ustalǵanyn jazǵan edik.